ԵՏՄ-ից օգուտն ավելի մեծ կլիներ, եթե տարածաշրջանը հայտնված չլիներ աշխարհաքաղաքական բարդ իրավիճակում: Ռուսաստանում նավթի գներով պայմանավորված տնտեսության անկումային վիճակը, այլ երկրների կողմից ՌԴ-ի նկատմամբ կիրառվող պատժամիջոցները խոչընդոտեցին, որպեսզի ԵՏՄ-ից ակնկալվող օգուտները մեր երկրի համար ավելի մեծ լինեին: Այսօր «Անալիտիկ» ակումբում ասաց տնտեսագետ Կառլեն Խաչատրյանը, պատասխանելով հարցին, թե ի՞նչ տվեց Հայաստանին ԵՏՄ-ին անդամակցությունը: Մեկ տարի առաջ մեր երկիրը միացավ Եվրասիական տնտեսական միությանը, որի նպատակն էր միության անդամ երկրների` Ռուսաստանի, Բելառուսի եւ Ղազախստանի հետ ազատ առեւտուրը, առանց մաքսատուրքերի արտահանումն ու ներմուծումը:
«Մեկ տարվա կտրվածքով դատելը ճիշտ չէ, միջնաժամկետ ժամանակահատված է հարկավոր, որպեսզի մենք կարողանանք հստակ ասել, թե միջազգային այս կամ այն կառույցին անդամակցությունը, այդ ինտեգրացիոն գործընթացները իրականում ինչ շոշափելի արդյունք տվեցին: Մեր անդամակցությունը ԵՏՄ-ին համընկավ Ռուսաստանի տնտեսության անկումային վիճակի հետ: Դա է պատճառը, որ Հայաստանն այս տարի տնտեսական օգուտները չզգաց»,-ասաց Կառլեն Խաչատրյանը:
Նա հույս հայտնեց, որ 4-5 տարուց «ԵՏՄ-ի տնտեսական պտուղները կքաղենք»:
Նրա խոսքերով, այլ երկրներում վիճակը շատ ավելի վատ է` Ուկրաինայում 16 տոկոս անկում է, ՌԴ-ում տարին կփակվի տնտեսական անկմամբ` 4-5 տոկոս: Տնտեսագետի կարծիքով, թեեւ Հայաստանի 2015 թվականին փոքր, բայց դրական աճը լավ ցուցանիշ է: Ըստ նրա, 2015 թվականին մեր տնտեսական աճն առավելապես պայմանավորված էր գյուղատնտեսության եւ հանքահումքային ոլորտներում արձանագրված աճով:
Կարդացեք նաև
Կառլեն Խաչատրյանի խոսքերով, պետք է չէ «տրագիկ» ընդունել պետական բյուջեի դեֆիցիտի ավելացումը: Ըստ նրա, վարկային ռեսուրսներ ներգրավելը, որպեսզի տնտեսությունն աշխուժանա, վատ բան չէ:
Լուսինե ԲՈՒԴԱՂՅԱՆ
