«ԱՄՆ-ն օգտագործում է իր վերջին հնարավորությունը Հայաստանի վրա ազդեցություն ունենալու հարցում»,-Aravot.am-ի հարցին՝ ինչպե՞ս կմեկնաբանի ԱՄՆ դեսպանատան հայտարարությունը, այսպես պատասխանեց «Կովկաս» ինստիտուտի փոխտնօրեն, քաղաքագետ Սերգեյ Մինասյանը:
Մանրամասնելով նա նշեց. «Որոշ չափով այս հայտարարությունը տարբերվում էր նախորդներից իր լրջությամբ: Դա հակված եմ բացատրելու նրանով, որ դեսպանատունը և այստեղ գործող անձնակազմը հասկանում են, որ փաստացի այս հանրաքվեից հետո վերջին հնարավորությունն է ՀՀ իշխանությունների ուշադրությունը հրավիրել ընտրական գործընթացներում գոյություն ունեցող խնդիրներին, քանի որ մյուս անգամ նման հնարավորություն կլինի միայն 2017-ին: Իսկ այն, թե ինչքան մեծ նշանակություն ունեն ՀՀ-ի համար այդ ընտրությունները, շատ լավ հասկանում են ԱՄՆ-ում: Վերջին հնարավորությունն է օգտագործել ընտրական գործընթացները ՀՀ իշխանության վրա ազդեցություն ունենալու համար»:
Քաղտեխնոլոգ Արմեն Բադալյանը նկատեց, թե ԱՄՆ-ի համար Հայաստանը կարևոր նշանակություն ունի այն առումով, որ օրինակ, Վրաստանը արևմտամետ է, Ադրբեջանը պահպանում է չեզոքություն, իսկ Հայաստանին դեռ կողմնորոշել է պետք. «Եթե ԱՄՆ-ին հաջողվի ՀՀ ապագա խորհրդարանում ձևավորել Արևմուտքի և ԱՄՆ-ի նկատմամբ դրական վերաբերմունք, ապա Հարավային Կովկասը կարող է դարձնել դաշնակից տարածք: Ուստի պետք է աշխատել, որ ՀՀ խորհրդարանում լինեն ուժեր, որոնք դրական են տրամադրված ԱՄՆ-ի նկատմամբ»:
Ըստ քաղտեխնոլոգի՝ այս հայտարարությունն այդ ծրագրի իրագործման բաղկացուցիչն է:
Կարդացեք նաև
Նա ամփոփեց. «Իր ազդեցությունը տարածելու համար ԱՄՆ-ն ունի ընդամենը մեկ տարի»:
Տաթև ՀԱՐՈՒԹՅՈՒՆՅԱՆ
