Քաղաքագետ Հրանտ Մելիք-Շահնազարյանի տպավորությամբ՝ Ալիևի գործողությունները ցույց են տալիս, որ Ադրբեջանի իշխանություններն ամեն ինչ անում են՝ խուսափելու Հայաստանի և Ադրբեջանի նախագահների հանդիպումից և տապալելու բանակցային գործընթացը: «Արմենպրես» լրատվական գործակալության մամուլի սրահում Հրանտ Մելիք-Շահնազարյանն այս առիթով մանրամասնեց. «Երևի Ալիևը հասկացել է, որ ոչ բանակցությունների միջոցով և ոչ էլ ռազմական ուժի ճանապարհով չի կարող արդարացնել բոլոր այն սպասելիքները, որոնք ձևավորել է իր հասարակությունում»:
Արևելագետ Վարդան Ոսկանյանը Ադրբեջանի վարած քաղաքականությունը պայմանավորում է այդ երկրի ներսում էթնիկական խնդրահարույց հարցերով, որոնց արդյունքում էլ էթնիկական տարրերի խմբերի շրջանում ակտիվություն է նկատվում:
Նա այս առիթով հայտարարեց. «Ադրբեջանը չի մասնակցում որևէ գործընթացի, ստանձնել է Թուրքիայի արբանյակի դերը: Նավթի համաշխարհային գները նվազել են, և խավիարով կաշառելով ադրբեջանահաճո որոշումներ գնելու գումարները զգալիորեն նվազել են»:
Ըստ արևելագետի՝ Ադրբեջանն առաջիկայում միջազգային հարթությունում կունենա լուրջ խնդիրներ, մասնավորապես զանազան հարվածների է արժանանալու և կորցնելու է իր դերակատարությունն աշխարհում:
Կարդացեք նաև
Հայաստանի համար պարոն Ոսկանյանը կանխատեսում է տարածաշրջանային նոր հնարավորություններ, քանի որ ի տարբերություն Ադրբեջանի՝ Հայաստանը կայունացնող գործոն է:
Դառնալով սահմանին Ադրբեջանի՝ շարունակաբար լարվածության պահպանմանը՝ պարոն Մելիք-Շահնազարյանն ասաց. «Ադրբեջանը, սահմանին լարվածություն առաջացնելով, փորձում է փոխել օրակարգը: Սահմանի իրավիճակի հանդարտեցումը կլինի նախագահների ամենամեծ ձեռքբերումը»:
Թեև քաղաքագետը կարծում է, որ համանախագահների երկարատև ջանքերի շնորհիվ հնարավոր եղավ կազմակերպել երկու նախագահների հանդիպում, բայց միևնույն ժամանակ փաստում է, որ համանախագահների գործիքակազմը այնքան էլ մեծ չէ, և չեն կարող լուրջ ճնշումներ, պահանջներ ներկայացնել հակամարտող երկրներին:
Տաթև ՀԱՐՈՒԹՅՈՒՆՅԱՆ
