Արտակ Զեյնալյանը կարծում է,
որ ՍԴ կարող են դիմել ՀԱԿ-ը եւ բոլոր կուսակցությունները
Իրավապաշտպան Արտակ Զեյնալյանը «Առավոտի» հետ զրույցում նշում է, որ յուրաքանչյուր խորհրդարանական կուսակցություն պարտավոր է մասնակցել ՀԱԿ-ի՝ Սահմանադրական դատարան դիմելու եւ սահմանադրական փոփոխությունների հանրաքվեն վիճարկելու ստորագրահավաքին. այդպես կքննարկվեին բոլոր այն իրավախախտումները, որոնց մասին բարձրաձայնվում է, եւ կփարատվեին եղած կասկածները:
Նշենք, որ դեռ ստորագրահավաքին միացել է 17 պատգամավոր, այնինչ ՍԴ դիմելու համար անհրաժեշտ է 27 պատգամավորի ստորագրություն, վերջնաժամկետն էլ դեկտեմբերի 18-ն է:
«Իհարկե, չեմ կարծում, որ հնարավոր կլինի հավաքել ստորագրությունները, որովհետեւ այդ կուսակցությունների մի մասն ամեն գնով ցանկանում էր, որ այդ Սահմանադրությունն ընդունվի, եւ ոչ թե ընդունվի ժողովրդի կողմից, այլ անկասկա՛ծ ընդունվի»,- ասում է պարոն Զեյնալյանը:
Կարդացեք նաև
Ըստ իրավապաշտպանի՝ այս գործընթացը շարունակելու այլ տարբերակ կա, ասում է, որ հանրաքվեի արդյունքները վիճարկելու իրավունք պետք է ունենա յուրաքանչյուր սուբյեկտ, որը գրանցված է եղել եւ ունեցել է քարոզչություն իրականացնելու լիազորություն: «Կարծում եմ՝ նաեւ ՀԱԿ-ը պետք է այդ իրավունքը ունենար, եւ բոլոր կուսակցությունները պետք է ունենան. դա եվրոպական կառույցների մշակած սկզբունքներից է: Այն իրավակարգավորումները, որ հիմա կան, որոնք կարելի է վիճարկել, դրանց մեկ հինգերորդը հակասում է իրավունքի էությանը»:
Երեկ ՀԱԿ խմբակցության նախագահ Լեւոն Զուրաբյանը լրագրողներին էր ներկայացրել Կենտրոնական ընտրական հանձնաժողովի կատարած պաշտոնական տվյալների կեղծիքները եւ հայտարարել, որ դրանց մասին հաղորդում է ներկայացնելու գլխավոր դատախազին, լրագրողների ներկայությամբ էլ ստորագրել էր հաղորդման տակ. պահանջում է քննություն կատարել ու քրեական պատասխանատվության ենթարկել բոլոր մեղավորներին:
Իրավապաշտպան Արտակ Զեյնալյանը, անդրադառնալով ընդդիմադիր ուժի այս քայլին, ասում է. «Անպայման պետք է վիճարկել, փորձել իրավական հարթության բոլոր մեխանիզմները, եւ պետք է պատասխանատվության ենթարկվեն բոլոր այն անձինք, որոնք իրականացրել են այդ իրավախախտումները: Պատասխանատվության ենթարկելը նաեւ կանխարգելիչ նշանակություն կունենա»:
Իրավապաշտպանը հանրաքվեի վիճարկման գործընթացների վերջնարդյունքի մասին դեռ չի ցանկանում խոսել: «Պետք է սպասենք, տեսնենք, թե ինչ կլինի»,- ասում է նա՝ չբացառելով, որ ինքն էլ ներգրավվածություն կունենա այդ գործընթացներում:
«Միշտ ներգրավված եմ լինում այսպիսի գործընթացներում, ձեռնպահ չեմ մնացել, անտարբեր չեմ եղել, եւ չի բացառվում, որ ապագայում եւս մասնակցեմ»,- ասում է նա:
ՀՌԻՓՍԻՄԵ ՀՈՎՀԱՆՆԻՍՅԱՆ
«Առավոտ» օրաթերթ
17.12..2015
