«Նոր Հայաստան» ճակատը այսօր հավաք-հանդիպումներ է անցկացնում Սյունիքի մարզում:
Կապանում «Ժառանգություն» կուսակցության առաջնորդ Րաֆֆի Հովհաննիսյանը բացելով քաղաքացիական ժողովը՝ հայտարարեց, որ օրակարգում երկու հարց է. «Առաջինը՝ ընտրությունը գողացած, կեղծած Սերժ Սարգսյանի ազատ արձակումը իր բռնազավթած աթոռից եւ երկրորդը՝ մինչեւ արդար, արտահերթ ընտրություններ՝ նախագահական եւ խորհրդարանական, ժողովրդի վստահությունը վայելող կառավարության կազմավորումը»:
Րաֆֆի Հովհաննիսյանը կոչ արեց, որպեսզի, իր բնութագրմամբ, պետական հանցագործություն կատարած բոլոր-բոլոր պաշտոնյաները ազատվեն եւ առաջարկեց. «Ոչ խնդրում ենք, ոչ էլ՝ պահանջում: Առաջարկում ենք, որ այդ մարդիկ, այդ պաշտոնյաները, որ մեծ սխալներ գործել են դեկտեմբերի 6-ին եւ դրանից առաջ, ինքնակամ դուրս գան, անցնեն թոշակի, որ ժողովուրդը վերջապես ունենա այն իշխանավորները՝ քաղաքապետ, մարզպետ, գյուղապետ, նախագահ, որոնք կծառայեն միմիայն ժողովրդին», – հայտարարեց նա եւ ավելացրեց, որ իրենք այդ չափանիշը քաղաք առ քաղաք, մարզ առ մարզ կիրառելու են ամենուր:
Աշոտ ՀԱԿՈԲՅԱՆ
