«Ժառանգություն» խմբակցության պատգամավոր Ալեքսանդր Արզումանյանը ևս միացել է ՍԴ դիմելո ՀԱԿ-ի ստորագրահավաքին:
Ալեքսանդր Արզումանյանը, հիշեցնենք, «կողմ» է սահմանադրական բարեփոխումներին: «Ցանկացած քննարկում նպաստում է ժողովրդավարությանը: Կա լեգիտիմության իսպառ բացակայություն եւ եթե ի վիճակի է, իշխանությունը պետք է փարատի մեր կասկածները կամ անսա ժողովրդի պահանջին եւ նոր քվեարկություն անցկացնի»,- ասաց նա:
Aravot.am-ի հարցին, մի տեսակ ձեւական չի՞ ՍԴ դիմելու գործընթացը, մանավանդ վստահություն չկա ՍԴ-ի նկատմամբ, ավելին, ընդդիմությունն իբրեւ ապացուցողական բազա, հիմնականում ներկայացնում է լրատվամիջոցների արձանագրած խախտումները, Ալեքսանդր Արզումանյանն ասաց. «Գուցեեւ: Բայց, ինչպես ասում են, կրկին փորձիր: Պետք է այնքան փորձենք, մինչեւ…Մենք հավատ չունենք, որ ՍԴ-ի, ոչ ընդհանրապես դատական համակարգի նկատմամբ: Բայց դա անձից չի կախված, դա համակարգից է կախված: Իմ կարծիքով, նոր սահմանադրությունը կարող է հույս ներշնչել, որ հնարավոր է՝ դատական համակարգն անկախացնել: Բայց, կապրենք`կտեսնենք: Կամք է պետք դա համար: Գործիքը կա, մնում է կամքը: Այս պահին ես կամքը չտեսա»:
«ԲՀԿ-ն երբեւէ ընդդիմադիր դաշտում չի գործել, ԲՀԿ-ն եղել է չիշխանություն: Հիմա էլ, գուցե, կիսիշխանություն: ՀՅԴ-ն էլ սկզբունքորեն պաշտպանում է իր 25 տարվա մոտեցումը»,- ասաց Ալեքսանդր Արզումանյանը`պատասխանելով հարցին` ինչո՞ւ մյուս ընդդիմադիր խմբակցությունները չեն միանում ստորագրահավաքին:
Կարդացեք նաև
Նելլի ԳՐԻԳՈՐՅԱՆ
