«Նոր Հայաստան» հանրային փրկության ճակատի քաղաքական խորհրդի անդամ Արմեն Մարտիրոսյանի՝ Ազատության հրապարակում ելույթի ժամանակ միջադեպ տեղի ունեցավ: Պարոն Մարտիրոսյանը մասնավորապես հայտարարեց. «ՀՀ-ում ընտրություններն ունեն բացառապես մեկ նպատակ՝ կեղծել, որը կոչվում է կոռուպցիա: Ակնհայտ է, որ այն անձինք, որոնք ներգավված են լինում դրա կազմակերպման մեջ, գտնվում են իշխանության ամենաբարձր օղակներում, որը համակարգվում է ՀՀԿ շտաբի կողմից և իր ղեկավարի՝ Հովիկ Աբրահամյանի գլխավորությամբ, և չակերտավոր գործողության պլանը, բարբարոսությունը հենց այնտեղ է ընդունվում: Իսկ կոռուպցիայի դեմ մենք կարող ենք պայքարել միայն իշխանափոխության միջոցով»:
Այս հայտարարության կապակցությամբ հրապարակից մի անձ ռեպլիկներ հնչեցրեց հատկապես բարբարոսություն արտահայտության վերաբերյալ: «Նոր Հայաստանի» մամուլի խոսնակ Վարուժան Ավետիսյանը խնդրեց ոստիկաններին կարգի հրավիրել այդ քաղաքացուն, ինչը միանգամից չստացվեց. ոստիկանները երկար բանակցում էին նրա հետ, որպեսզի նա հեռանա և չխանգարի, նա էլ վստահեցնում էր, թե հանգիստ կկանգնի:
Նշենք, որ թեև «Նոր Հայաստան» հանրային փրկության ճակատը վաղվանից սկսում է մարզային այցելությունները, սակայն Ազատության հրապարակում ամեն օր՝ ժամը 17.00-ին կշարունակվեն անցկացվել տեղեկատվական հավաքները:
Տաթև ՀԱՐՈՒԹՅՈՒՆՅԱՆ
Կարդացեք նաև
