«Նոր Հայաստան» հանրային փրկության ճակատի քաղաքական խորհրդի անդամ, «Ժառանգություն» կուսակցության նախագահ Րաֆֆի Հովհաննիսյանը, քիչ առաջ Ազատության հրապարակում անդրադառնալով ԱՄՆ դեսպանատան՝ սահմանադրական հանրաքվեի վերաբերյալ հայտարարությանը, նշեց. «Իհարկե, այդ հայտարարությունը նշանակում է, որ Ամերիկան լրջագույն մոտեցում է ցուցաբերում ՀՀ ներքին դրվածքին: Ցանկություն ունեմ, որ Սարգսյան Սերժի հրաժարականի, անցումային կառավարության կազմավորման և արտահերթ ընտրությունների հարցը լուծենք առանց օտար երկրների միջամտության: Բայց եթե Եվրոպան, ԱՄՆ-ն ուշացած ուզում են կիրառել ժողովրդավարական սկզբունքները, դա միայն կարելի է ողջունել: Սակայն ոչ թե ճանաչել կեղծաքվեի ընթացակարգը, այլ մերժել, քանի որ ԱՄՆ-ում, եվրոպական ցանկացած երկրում դա մերժելի ու առոչինչ կլիներ»: Հարցին՝ արդյոք միանալու՞ են ՀԱԿ-ի՝ հանրաքվեի արդյունքները Սահմանադրական դատարանում վիճարկելու նախաձեռնությանը և ի՞նչ հույսեր են կապում այդ կառույցի հետ, պարոն Հովհաննիսյանը պատասխանեց. «Ժառանգությունը» չի միանալու, թեև ողջունել է ՀԱԿ-ի քայլը: Կոչ եմ անում մեր գործընկերներին մենաշնորհային խոսքից դուրս գալ, քանի որ իրական ընդդիմությունը դարձել է ժողովրդի ոգին ու մեծամասնությունը: Եվ այն ժողովուրդը, որ կա հիմա հրապարակում, մենք կտեսնենք առաջիկա շաբաթների ու ամիսների ընթացքում, որ կդառնա այն ուժը, որը կերտելու է Նոր Հայաստանը: Ողջունում ենք ՀԱԿ-ի աշխատանքը, բայց մեր գործը հիմնականում հրապարակում է»:
Պարոն Հովհաննիսյանն այս առիթով կրկին շեշտեց, թե ՍԴ նախագահ Գագիկ Հարությունյանը ի սկզբանե գտնվել է շահերի բախման մեջ: Ըստ Րաֆֆի Հովհաննիսյանի՝ նրանք, ովքեր մասնակցել են այդ փաստաթղթի ստեղծմանը, պիտի հեռու մնան դրա վերաբերյալ դատական գործերից: Այնուհետև հիշեցրեց, թե Սերժ Սարգսյանը ժամանակին ցանկանում էր իրեն դարձնել այդ հանցագործության հեղինակը:
Տաթև ՀԱՐՈՒԹՅՈՒՆՅԱՆ
