«Հայ խոհարարական ավանդույթների զարգացման և պահպանման» հասարակական կազմակերպությունը դեկտեմբերի 15-ին «Մեգերյան կարպետ» ցուցասրահում ամփոփեց այս տարվա գործունեությունը:
Ազգային-մշակութային խմբերի կատարումներով եւ հայկական անուշեղենների հյուրասիրությամբ ուղեկցվող միջոցառման ժամանակ ներկայացվեց Անիի խոհանոցը:
«Հայ խոհարարական ավանդույթների զարգացման և պահպանման» հ/կ նախագահ Սեդրակ Մամուլյանն Aravot.am-ին հայտնեց, որ կազմակերպությունն ավանդաբար զբաղվել է կերակրատեսակների հավաքչությամբ եւ ներկայացմամբ. «Ուսումնասիրություններ ենք իրականացրել Մատենադարանում եւ Մխիթարյան միաբանությունում, պայմանավորվածություն ենք ձեռք բերել այցելելու նաեւ Երուսաղեմի գրադարան»:
Կարդացեք նաև
Սեդրակ Մամուլյանի գնահատմամբ՝ կարեւորագույն նախաձեռնությունը կապված է 11-14-րդ դդ. Անիի խոհանոցի ուսումնասիրության հետ: Այն իրականացրել է ազգագրագետ Խորեն Գրիգորյանը. «Մեզ հաջողվեց դաշտային աշխատանքների արդյունքում Տրանսիլվանիայից (Ռումինիա), Լեհաստանից եւ Ուկրաինայից հավաքագրել Անիի խոհանոցին առնչվող նյութեր: Արդեն 5 կերակրատեսակ ներկայացրել ենք Մոսկվայում՝ մեր հայրենակիցներից մեկի ռեստորանում: Տրանսիլվանիայում բնակվող մեր հայրենակիցները, որոնք 11-14-րդ դարերում են գաղթել Անիից, պահպանել են ազգային խոհանոցը: Նրանց հայ լինելու մասին ոչինչ չի հիշեցնում, բացի ազգային կերակրատեսակներից: Նրանք մոռացել են լեզուն, ազգային դիմագիծը, հավատքը եւս չի պահպանվել, բայց իրենք գիտեն, որ ծագումով հայ են»,-պատմեց Մամուլյանը:
Մեր զրուցակիցը ներկայացրեց Անիի ազգային կերակրատեսակներից մեկը՝ ականջապուրը, որն ականջանման խմորագնդերից պատրաստված ապուր է. «Հետաքրքիր է, որ ապուրին ավելացնում են մի համեմունք, որը Տրանսիլվանիայի հայերը պահպանել են 1000 տարի: Համեմունքը կոչվում է «Խուռութ». չորաթանի մի տեսակ է, բայց պատրաստվում է կաթից: 40 օր կաթը թթվեցնում են, եփում, կաթը կտրվում-դառնում է կաթնաշոռ, որը ջերմային մշակման են ենթարկում, ապա ավելացնում նեխուր, մաղադանոս եւ թարխուն: Այդ զանգվածը չորացնում են եւ պահում, հետագայում ավելացնում բոլոր կերակրատեսակներին»:
Նշենք, որ այս տարի եւս կազմակերպությունը գործակցել է ուսումնական հաստատությունների հետ. «Միշտ մասնագիտական օգնություն ենք ցուցաբերում այն հաստատություններին, որտեղ ուսուցանվում է ազգային խոհանոցը»,-նշեց Սեդրակ Մամուլյանը: Նա նաեւ հավելեց, որ կազմակերպվել են տոլմայի, խորովածի, «Հացը լեռներում» փառատոները, իսկ օգոստոսի 11-ին տոնվել է Նավասարդը:
Միջոցառման ընթացքում ազգային-խոհարարական ավանդույթների պահպանման եւ լուսաբանման համար շնորհակալագրով պարգեւատրվեցին կազմակերպության գործընկերները եւ մի շարք լրատվամիջոցներ, այդ թվում՝ «Առավոտը»: «Ազգային խոհանոցի երախտավոր» անվանակարգում մեդալի արժանացավ խոհարար Գարիկ Գևորգյանը:
Լուիզա ՍՈՒՔԻԱՍՅԱՆ
