Այս տարի հուլիսին Ռուսաստանի Սահմանադրական դատարանը որոշել է, որ կառավարությունը կարող է չկատարել Մարդու իրավունքների եվրոպական դատարանի որոշումները, եթե «դրանք հակասում են Ռուսաստանի Սահմանադրությանը»։ Սահմանադրական դատարանը միևնույն ժամանակ նշում է, որ Ռուսաստանի վերաբերյալ գործերն ընդդատյա են Եվրոպական դատարանին: Այս որոշումը լուրջ քննադատության առարկա դարձավ միջազգային իրավունքի մասնագետների կողմից:
Մտահոգություններ կան, որ անդամակցելով ԵԱՏՄ-ին՝ ՀՀ-ին ևս նման որոշում կարող է սպառնալ: ՀՀ Սահմանադրական դատարանի անդամ, ՄԻԵԴ նախկին դատավոր Ալվինա Գյուլումյանը կարծում է, որ Հայաստանում նման բան լինել չի կարող ու մանրամասնում. «Հայաստանի պարագայում նման բան հնարավոր չէ: Ի տարբերություն Ռուսաստանի՝ մենք Հայաստանում մինչև Եվրոպական կոնվենցիան վավերացնելը քննարկման առարկա ենք դարձրել դրա՝ ՀՀ Սահմանադրությանը համապատասխանության հարցը: Արդյունքում ունենք ՍԴ որոշում, որ կոնվենցիան չի հակասում մեր Սահմանադրությանը: Իսկ եթե չի հակասում, ուրեմն արդեն համարվում է մեր օրենսդրության բաղկացուցիչ մասը»:
Տիկին Գյուլումյանը վստահեցրեց, թե հնարավոր չէ համեմատել ԵԱՏՄ-ի դատարանը ՄԻԵԴ-ի հետ, քանի որ դրանք բոլորովին այլ իրավական ակտեր են քննարկում:
Անդրադառնալով ՌԴ ՍԴ-ի խնդրահարույց որոշմանը՝ տիկին Գյուլումյանը նշեց, որ դեռ հոկտեմբերին, երբ համաժողովներից մեկի ընթացքում հանդիպել է ՌԴ ՍԴ ներկայացուցչին, այս առիթով հակադարձել է նրան՝ ասելով, որ այդ որոշումը դեմ է ՌԴ միջազգային պարտավորություններին, և եթե գտնում են, որ ՄԻԵԴ-ի վճիռները կարող են հակասել իրենց Սահմանադրությանը, դա արդեն միջազգային հարաբերությունների քննության հարց է:
Կարդացեք նաև
Հավելենք, որ Ռուսաստանը Եվրոպական դատարանի որոշումները չկատարող երկրների առաջին եռյակում է՝ Իտալիայից և Թուրքիայից հետո:
Տաթև ՀԱՐՈՒԹՅՈՒՆՅԱՆ
