Օրվա իշխանությունը ունի իր վերարտադրության ճանապարհային քարտեզը և վերջերս անցկացված սահմանադրական բարեփոխումների հանրաքվեի միջոցով ամեն ինչ արվեց, որպեսզի իշխանությունը հավերժացվի:
Այսօր գրավի առարկա է դարձել ոչ միայն շարքային քաղաքացիների ունեցվածքը կամ թանկարժեք նյութական միջոցները, այլև իշխանության արժանապատվությունը…:
Իշխանությունը, և հատկապես նրա բարձրագույն էլիտան, երբևէ պատասխան չտվեց, թե ի՞նչ եղավ ԿԲ-ի ոսկու պահուստային պաշարները, ինչպե՞ս չհայտնաբերվեց Նաիրիտի սեփականատերը, ո՞ւր գնաց «վնասով» աշխատող ՀԷՑ-ի ֆինանսական միջոցները, ինչպե՞ս հաշվարկվեց Հայաստան ներմուծվող գազի սակագինը, որը շատ թանկ է նստում շարքային քաղաքացիների վրա, ո՞ր օֆշորում են կուտակվում կուտակայինի սոցիալական վճարները: Աշխարհում նավթի գինը կտրուկ ընկել է, սակայն մեր երկրում բենզինի վաճառքը կատարվում է նախկինի նման:
Բնականաբար վերը թվարկվածները չեն ամբողջացնում այն պատկերը, որում ապրում են մեր քաղաքացիները: Եվ գուցե նաև դրանց ամբողջությունն է ստեղծել աղքատության 36-37% ցուցանիշ, աշխատունակ ուժի գործազրկության՝ 20% և իհարկե ամենօրյա արտագաղթ:
Կարդացեք նաև
Դժվար է մեկ հրապարակման մեջ թվարկել ՀՀ-ում քաղաքացիների վրա ծառացած բոլոր հիմնահարցերը:
Եվ այս ամենը մշտապես արվել և արվում է «բարեփոխումների» թմրադեղով…:
Ստեղծվել է մի իրավիճակ, երբ հանրության առջև ծառացած սոցիալական դժվարությունները ճզմվում են և հասարակական կարծիքը անտեսվում, իսկ միջազգային տարբեր կառույցների և անհատների խոսքը ընդունվում է իբրև մեր սուվերեն իրավունքների նկատմամբ որոշակի մոտեցում, որը կարելի է և արհամարհել:
ՀՀ-ն Մետաքսի ճանապարհային քարտեզում չի նշմարվում և, բնականաբար, օրվա էլիտան աչքի լույսի պես փայփայում է իր վերարտադրության ճանապարհային քարտեզը:
Մոլորակի ցանկացած պետություն փնտրում է իր ազդեցության ոլորտները և գերակա շահերը: Բոլոր այն երկրները, որոնք զրկված են նման հնարավորությունից, իբրև ազդեցության գոտի իշխանությունները ընտրում են ներքին կյանքում ազդեցությունը պահպանելու վճռականությունը:
Դե ինչ, մնում է հուսալ, որ ցանկացած դժվարություն անցողիկ է և անցկացրած հանրաքվեն թո՛ղ անցած լինի…:
Գառնիկ Վաղարշակյան
ՀԱՄԿ-ի պատասխանատու քարտուղար
