Հայ Ազգային Կոնգրեսը ստորագրահավաք է սկսել ԱԺ պատգամավորների շրջանում՝ հանրաքվեի արդյունքները Սահմանադրական դատարանում վիճարկելու համար։ ՀԱԿ-ը մտադիր է Սահմանադրական դատարան դիմել մինչեւ շաբաթվա վերջ:
Հիշեցնենք, որ ՍԴ-ում հանրաքվեի արդյունքները վիճարկելու համար անհրաժեշտ է նվազագույնը 27 պատգամավորի ստորագրություն:
Սահմանադրական բարեփոխումների նախագծին խորհրդարանում «դեմ» է քվեարկել տասը պատգամավոր` ՀԱԿ խմբակցությունից Ստեփան Դեմիրճյանը, Գագիկ Ջհանգիրյանը, Նիկոլ Փաշինյանը, Հրանտ Բագրատյանը, Արամ Մանուկյանը, Լեւոն Զուրաբյանը, ԲՀԿ խմբակցությունից Տիգրան Ուրիխանյանը, Զարուհի Փոստանջյանը, Իշխան Խաչատրյանը, Հեղինե Բիշարյանը: Ձեռնպահ են քվեարկել ՕԵԿ-ական Հովհաննես Մարգարյանը, Լեւոն Դոխոլյանը եւ Մհեր Շահգելդյանը: Նիստին ներկա է եղել, սակայն չի քվեարկել Խաչատուր Քոքոբելյանը:
Եթե անգամ տեսականորեն ընդունենք, որ նախագծին «դեմ», «ձեռնպահ» քվեարկած կամ քվեարկությանը չմասնակցած պատգամավորները միանան ՀԱԿ-ի նախաձեռնությանը, միեւնույն է՝ 27 ստորագրություն հավաքելը բավական բարդ է լինելու:
Կարդացեք նաև
Aravot.am-ի տեղեկություններով, ՀԱԿ-ը բանակցությունների մեջ է պատգամավորների հետ: «Ժառանգություն» խմբակցության պատգամավոր Թեւան Պողոսյանն ասաց, որ ինքը միանալու է ՀԱԿ-ի դիմումին: «Նախ, ուրախ եմ, որ առաջիկայում կդառնանք խորհդարանական երկիր, ես դրա կողմնակիցն եմ: Միացել եմ, ելնելով այն խնդիրներից, որ պառլամենտական երկրում ամենակարեւոր բաներից մեկը ընտրական գործընթացի նկատմամբ վստահությունն է: Միացել եմ հանուն նրա, որ ապագայում էլ կարողանանք ամեն ինչ անել, որ ունենանք մաքուր ընտրություններ: Ապագայում էլ բոլոր կեղծարարները հասկանան, որ իրենց ետեւից գնալու են միշտ եւ իրենք պատիժներ են կրելու»,- ասաց նա:
Ստորագրահավաքին միացել է նաեւ անկախ պատգամավոր Էդմոն Մարուքյանը:
«Ժառանգություն» խմբակցության պատգամավոր, նախկին ՀԱԿ-ական Ալեքսանդր Արզումանյանին դեռ չեն դիմել:
Խաչատուր Քոքոբելյանին, մեր տեղեկություններով, առայժմ միջնորդավորված են դիմել:
ՕԵԿ-ում խուսափում են խոսել այդ մասին:
Նելլի ԳՐԻԳՈՐՅԱՆ
