«Մարդու իրավունքների եվրոպական կոնվենցիայի և մարդու իրավունքների եվրոպական դատարանի նախադեպային իրավունքի կիրառման ամրապնդումը Հայաստանում» ծրագրի ամփոփիչ համաժողովին ծրագրի շահառու կազմակերպությունների ներկայացուցիչներն, ընդհանուր առմամբ, գոհունակություն հայտնեցին:
Ծրագիրը մեկնարկել է 2013-ի հոկտեմբերին՝ Եվրոպայի խորհրդի նախարարների կոմիտեում Հայաստանի նախագահության ընթացքում և տևել է 27 ամիս. ավարտվել 2015-ի դեկտեմբերին: Ծրագրի հիմնական նպատակն էր ամրապնդել Վճռաբեկ դատարանի կարողությունները, զարգացնել նորաստեղծ Արդարադատության ակադեմիայի ուսուցողական կարողությունները, հզորացնել Արդարադատության նախարարության, մասնավորապես ՄԻԵԴ-ի հետ կապերի վարչության կարողությունները:
ՀՀ վճռաբեկ դատարանի քաղաքացիական և վարչական պալատի նախագահ Երվանդ Խունդկարյանը նշեց, թե ունեն լուրջ նվաճումներ. «2013-2015-ին տեղի ունեցան բազում սեմինար- քննարկումներ բոլոր ատյանի դատավորների համար, ՀՀ դատարանների նախագահների խորհրդի կողմից ստեղծվեց կառույց՝ Եվրոպական դատարանի նախադեպային որոշումների ուսումնասիրման ծառայությունը: Ավարտական փուլում են գտնվում Դատալեքս առցանց տվյալների բազայի որոնողական կարողություններին ուղղված աշխատանքները»:
ՀՀ Արդարադատության ակադեմիայի ռեկտոր Ռուբեն Մելիքյանը կարևորեց ծրագրի կրթական բաղադրիչը. «Ծրագրի շրջանակներում լավ համադրություն է արվել բաղադրիչների առումով, ինչը ծրագրին հաջողություն բերող տարրերից է: Արդարադատության ակադեմիան որպես կրթական բաղադրիչ ապահովող մարմին մեր երկրում կարևորվում է, քանի որ վտանգ կա, որ շատ իրավական նորմեր, ծրագրեր կմնան թղթի վրա, եթե դրանք ճիշտ ձևով չներկայացվեն համապատասխան շահառուին: Մեր խնդիրն է նաև, որ կարողանանք ճիշտ ու գրագետ այն ներկայացնել մեր շահառուներին»:
Կարդացեք նաև
Aravot.am-ը իրավապաշտպան, Հայաստանի Հելսինկյան կոմիտեի նախագահ Ավետիք Իշխանյանից հետաքրքրվեց՝ արդյոք նման ծրագրերի իրագործումը արդյունավե՞տ կլինի, եթե ՀՀ իշխանությունները քաղաքական կամք չդրսևորեն դատական համակարգում գոյություն ունեցող խնդիրների լուծման համար, պարոն Իշխանյանը պատասխանեց. «Քաղաքական կամք բառը ես չեմ ընդունում, քանի որ որևէ իշխանություն կամք չի ունենում իշխանությունը սահմանափակելու, իսկ արդար դատավարությունը սահմանափակում է իշխանությունը: Որևէ իշխանություն նման կամք չի կարող դրսևորել: Բարի թագավորների մի սպասեք: Խնդիրն այն է, թե ինչքանով է ծրագիրն արդյունավետ: Այն արդյունավետ է այնքանով, որ ամեն դեպքում դատավորներն ավելի լավ են տիրապետելու եվրոպական կոնվենցիային և նախադեպային իրավունքին, բայց ինչքանո՞վ այն պրակտիկայում արդյունավետ կգործի, սա այլ հարց է: Չեմ կարծում, որ արդյունավետությունը շատ մեծ կլինի: Քանի դեռ չկա դատարանի դե յուրե և դե ֆակտո անկախություն, ապա նման ծրագրերն ուղղակի իրազեկում կբարձրացնեն, բայց հուսանք, որ ինչ որ ժամանակ հետո դատավորների անկախության մասին կխոսենք:
Տաթև ՀԱՐՈՒԹՅՈՒՆՅԱՆ
