Այսօր ԱԺ արտահերթ նստաշրջանում քննարկվեց «Ձերբակալված եւ կալանավորված անձանց պահելու մասին» ՀՀ օրենքում փոփոխություններ եւ լրացումներ կատարելու մասին օրենքի նախագիծը:
Արդարադատության փոխնախարար Արման Թաթոյանն ասաց, որ գործող օրենքով ձերբակալվածին տեսակցության կարող է գալ իր փաստաբանը, նա, ով ստանձնել է պաշտպանությունը: Սակայն երբեմն կարիք է լինում փաստաբանի հետ տեսակցել, երբ նա դեռ պաշտպան չէ քրգործում ներգրաված:
Բացի այդ, այսօրվա գործող օրենքով, ոչ աշխատանքային օրերին ու ժամերին հնարավոր չէ տեսակցություն իրականացնել, ընդ որում, տեսակցության ժամերն են 10-17-ը: Այս արգելքն առաջարկում են վերացնել եւ սկսել տեսակցել անարգել:
ՕԵԿ խմբակցության ղեկավար Հեղինե Բիշարյանը հետաքրքրվեց, թե դատապարտյալների սանիտարահիգիենիկ պայմանների հետ կապված չե՞ն պատրաստվում փաթեթ բերել, այդ պայմաններից կալանավորները հիվանդություններ են ձեռք բերում:
Կարդացեք նաև
Արման Թաթոյանը պատասխանեց, որ Քրեակատարողական նոր օրենսգիրք են ներկայումս մշակում, այնտեղ նոր սկզբունքներ ունեն պատժի կրման պայմանների, այլընտրանքային պատժի, ընտանիքի անդամների տեսակցության հետ կապված:
Այս նախագծի քննարկման ժամանակ ՀՀԿ խմբակցության պատգամավոր Արտաշես Գեղամյանը օրենքի հետ բոլորովին կապ չունեցող ելույթ ունեցավ՝ անուղղակիորեն անդրադառնալով հիմնականում Զարուհի Փոստանջյանին: Նրա խոսքերով՝ այդ հռետորը, որը քանիցս վտանգավոր ելույթ ունեցավ, անգամ ինքն էլ պատկերացում չունի, թե ինչ ծայրաստիճան կործանարար գործառույթի մեջ է ընդգրկված: Ըստ նրա, հենց ԱԺ-ի ամբիոնից ազգայնամոլության ծրագիր են ուզում իրականացնել. «Քանիցս ասում են՝ էս ենք անելու, էն ենք անելու, ռեժիմը կխաթարենք: Բավական է զենք լինել թշնամու ձեռքին, բավական է շանտաժի ենթարկել այն իշխանությունը, որը աննախադեպ հաջողություն է գրանցել արտաքին քաղաքականության ոլորտում: Թշնամին չի անցնի, ինչքան էլ սատարեն զանազան ազդեցության ագենտները»:
Գալուստ Սահակյանը փորձեց ընդհատել Գեղամյանին, բայց վերջինս հորդորեց հավասարության սկզբունքով թույլ տալ, որ ավարտի իր ձոնը՝ առ իշխանություն:
Նա սկսեց գովերգել ՀՀ գլխավոր գերագույն հրամանատարին, արտգործնախարարին, որոնք հսկայական աշխատանք են անում, ու ընդդիմությունը ջուրն է լցնում այդ հսկայական աշխատանքը:
Հռիփսիմե ՋԵԲԵՋՅԱՆ
