2015-ի հուլիսի 1-ի դրությամբ Մարդու իրավունքների եվրոպական դատարանում (ՄԻԵԴ) ընդդեմ Հայաստանի ստացվել է 2469 դիմում, որից 600 ներկայացրել են Ադրբեջանի քաղաքացիները: Այդ բողոքներից 1093-ի՝ 45 տոկոսի քննությունը ընթացքի մեջ է:
ՀՀ Սահմանադրական դատարանի անդամ, ՄԻԵԴ նախկին դատավոր Ալվինա Գյուլումյանը «Մարդու իրավունքների եվրոպական կոնվենցիայի և մարդու իրավունքների եվրոպական դատարանի նախադեպային իրավունքի կիրառման ամրապնդումը Հայաստանում» ծրագրի ամփոփիչ համաժողովին որոշ մանրամասներ ներկայացրեց Եվրոպական դատարանի՝ ընդդեմ Հայաստանի գործերի մասին. «Քննության ենթարկված 60 բողոքներից 55-ի պարագայում դատարանը կայացրել է մեկ կամ մի քանի իրավունքի խախտումներ: Առավել հաճախ դատարանը գտել է, որ խախտվել է մարդու ազատության և անձեռնմխելիության իրավունքը: Ցավալի է, որ ՀՀ-ի նկատմամբ ամրագրված խախտումների թվում երրորդ տեղում են խոշտանգումներն ու անմարդկային վերաբերմունքը արգելող խախտումները՝ 15 խախտում 11 գործով: Սեփականության իրավունքի խախտում է գրանցվել 12 բողոքների դեպքում, հավաքների ու միավորումների խախտումով՝ 8 դեպք»:
Կատարելով եզրահանգումներ՝ տիկին Գյուլումյանը նշեց. «Ժողովրդավարության ցցուն օրինակներից մեկը հանդիսանում է հավաքների և ցույցերի ազատության ապահովումը, և այդ առումով արձանագրված խախտումները մեզ հնարավորություն են տվել, որ մենք այդ բնագավառում մեր օրենսդրությունը կատարելագործենք: Մի տխուր եզրահանգում եմ այս առումով կատարել. ինձ թվում է, որ մեզանում դեռ լիարժեք չի ընկալված մեր պետության անկախության գաղափարը: Հաճախ մարդիկ կարծես թե մտածում են նախկին ԽՍՀՄ տարբերակով, որ դեռ կա մի ատյան, որին կարելի է դիմել ու հասնել հաջողության: Իհարկե, ես սա չեմ ասում, որ մարդիկ չդիմեն Եվրոպական դատարան, այլ խոսում եմ հոգեբանության մասին»:
Տաթև ՀԱՐՈՒԹՅՈՒՆՅԱՆ
