Ինչպես տեղեկացրել ենք, «Ժառանգություն» խմբակցության պատգամավոր Զարուհի Փոստանջյանն ու նիստը վարող, ԱԺ փոխխոսնակ Էդուարդ Շարմազանովը վիճեցին նիստի ընթացքում, քանի որ Շարմազանովը նորից անջատել տվեց պատգամավորի խոսափողը: Փոստանջյանը համառորեն չէր լքում ամբիոնը, այնքան ժամանակ, մինչեւ Շարմազանովը ստիպված հայտարարեց 30 րոպե ընդմիջում:
Ընդմիջումից հետո Էդուարդ Շարմազանովը հորդորեց հաշտ-համերաշխ շարունակեն աշխատել՝ արդեն թույլատրելով Փոստանջյանին, որ շարունակի իր ելույթը, միայն թե՝ օրենքի շրջանակներում:
Զարուհի Փոստանջյանի խոսքերով՝ քաղաքացիները վտանգ են ներկայացնում հանցավոր ռեժիմին. «Այդ վտանգը իրենք զգալով են այսպիսի միջոցներ կիրառում: Բայց շատ մի վախեցեք որովհետեւ մենք ձեզ ցավ չենք պատճառելու, ինչպես դուք եք մեզ ցավ պատճառում»:
Նա մեկ առ մեկ ներկայացրեց, թե այս օրերին որ մարզում որ ժամին են հանդիպում ունենալու քաղաքացիների հետ եւ բարձրացնելու անհնազանդության ալիք՝ ընդդեմ ռեժիմի:
Կարդացեք նաև
Շարմազանովը ելույթից հետո արձագանքեց. «Այնուամենայնիվ, դուք չլսեցիք մեր հորդորները եւ հայտարարեցիք այն, ինչ չեք կարողանում հայտարարել միտինգներին»:
Զարուհի Փոստանջյանը կոչ էր արել հարկերը, տուգանքները չվճարել: Շարմազանովը արձագանքեց. «Եթե հարկերը չվճարեն, մենք բանակ ո՞նց եք պահելու, տատիկ-պապիկների թոշակը ո՞նց ենք տալու, մանկավարժների, բժիշկների աշխատավարձը ո՞նց ենք տալու, իր աշխատավարձը ոնց ենք տալու: Դրա համար լավ կլինի մտածել, նոր խոսել»:
Հռիփսիմե ՋԵԲԵՋՅԱՆ
