Արտակարգ եւ լիազոր դեսպան Արման Նավասարդյանի համոզմամբ, ռուս-թուրքական հարաբերությունների սրացման ֆոնին, եթե Ռուսաստանը բացահայտ գործողությունների չդիմի, կօգտագործի քրդական հարցը:
Այսօր «Հայելի» ակումբում քաղաքագետ Շուշան Խաթլամաջյանն էլ նկատեց, որ Թուրքիան չվարանեց փչացնել ՌԴ հետ հարաբերությունները, որովհետեւ իրականում այնքան էլ չէր գնահատում այդ հարաբերությունները. «Թուրքիայի առջեւ բացվում են հեռակա ծրագրեր: ՌԴ-ն դրվեց այն վիճակում, որ չէր կարող չպատասխանել, այսինքն, քաղաքականապես ու տնտեսապես մտնում է ծուղակի մեջ, իսկ զարգացումներն իր օգտին չեն լինում»:
Նրա խոսքով, սուր զարգացումներ հնարավոր են, բայց ռազմական կոնֆլիկտների, հայ-ադրբեջանական լայնամասշտաբ պատերազմի մասին առայժմ հիմքեր չկան խոսելու:
ՀԱՊԿ-ի լռությունը պարոն Նավասարդյանը բացատրեց ռուս-թուրքական հարաբերությունների վատացման ֆոնին. «Լռությունը ցույց տվեց, որ ՀԱՊԿ-ն թույլ ու չկայացած կազմակերպություն է, պատահական չէ, որ ՌԴ-ն ՀԱՊԿ-ին բացարձակապես չներգրավեց սիրիական ընկերության մեջ, բայց ամենակարեւորը, որ ՌԴ-ն այս իրավիճակում հասկացավ, թե ինչ է նշանակում Թուրքիայի, Ադրբեջանի հետ բարեկամությունը: Արդեն շրջանառության մեջ է մտել Մոսկվայի, Ղարսի, Սեւրի պայմանագրի վերանայման հարցը: Վիճակը գերլարված է»:
Կարդացեք նաև
Պարոն Նավասարդյանը վստահ է, որ ՌԴ-ն կկանգնի ՀՀ կողքին, եթե խոսքը վերաբերի լուրջ ընդհարումների:
Քաղաքագետն էլ նկատեց, որ եթե Ալիեւ-Սարգսյան առաջիկա հանդիպումը կայանա, տարածաշրջանում լարված իրավիճակի փոփոխություն չի լինի. «Չեմ կարծում՝ իրավիճակը փոխվի, քանի դեռ Արեւմուտքը Թուրքիայի նկատմամբ սանձազերծող գործողություններ չի կիրառում: Այն վտանգավոր խաղը, որ Թուրքիան սկսել է Իրաքում, Սիրիայի սահմաններում, պրովոկացիաների ասպարեզում, Արեւմուտքի լռությունը քաջալերում է ագրեսորին…այնուամենայնիվ, չեմ կարծում, որ Թուրքիան պատերազմական գործողությունների գնա, որովհետեւ ՆԱՏՕ-ն նրան չի քաջալերի, ԱՄՆ-ը շահագրգռված չէ պատերազմական գործողություններով»:
Արփինե ՍԻՄՈՆՅԱՆ
