Կառավարության հրավիրած ԱԺ արտահերթ նիստի ընթացքում այսօր քննարկվեց «Ավելացված արժեքի հարկի մասին» օրենքում փոփոխություններ կատարելու մասին հարցը:
Հիմնական զեկուցող՝ էկոնոմիկայի փոխնախարար Գարեգին Մելքոնյանն ասաց, որ այս նախագծով առաջարկում են անմաքս առեւտրի գոտու ռեժիմից օգտվեն ՀՀ-ում ոչ միայն օդանավակայանի տարածքում գործող առեւտրի կետերը, այլ նաեւ նման հնարավորություն տրվի ցամաքային անցակետերում գործող առեւտրի կետերին: Մասնավորապես, հնարավորություն է ընձեռվելու, որ Մեղրիում, Բավրայում եւ Բագրատաշենում տեղակայված առեւտրի կետերը նույնպես օգտվեն դրանից:
Ներկայումս անմաքս առեւտրի կետերից միայն օդանավակայանի առեւտրի կետերն են ազատվում ԱԱՀ-ից, հիմա այն տարածվելու է նաեւ ցամաքային բոլոր անցակետերին:
Փոխնախարարը նշեց, որ մասնավոր հատվածից են ստացել այդ խնդրանքը, որ այն տարածվի նաեւ իրենց վրա:
Կարդացեք նաև
ՕԵԿ պատգամավոր Հովհաննես Մարգարյանը հետաքրքրվեց, թե երկաթուղային կայարաններում տեղակայված առեւտրի կենտրոնները նույնպե՞ս ընդգրկվում են այս օրենքի կարգավորման դաշտում՝ փոխնախարարը պատասխանեց՝ այո, եթե դիմող ընկերությունը բավարարում է անմաքս առեւտրի գոտու համար նախատեսված ռեժիմային պայմաններին, չափորոշիչներին:
ԲՀԿ պատգամավոր Միքայել Մելքումյանը հետաքրքրվեց՝ եթե մասնավոր հատվածից ազդակներ չստանայիք, չէի՞ք անելու եւ կոնկրետ ումի՞ց եք նման խնդրանք ստացել:
Պատգամավորը նաեւ հարցրեց. «Գրել եք, որ բյուջեի վրա այս օրենքի փոփոխությունը որեւէ ազդեցություն չի ունենալու,բայց եթե առաջ ԱԱՀ էր գանձվում, հիմա չի գանձվելու, ո՞նց կարող է բյուջեի վրա որեւէ ազդեցություն չունենա:
Փոխնախարարը պատասխանեց, որ իրենց դիմել է «Դյութի ֆրի ալյանս» կոչվող ասոցիացիան, որը հանդիսանում է աշխարհում անմաքս առեւտրի կետերի միություն. «Այս կազմակերպության հիմնադիր ընկերություն կա գրանցված ՀՀ-ում, որը կոչվում է Դյութի ֆրի ալյանս ՍՊԸ: Նրանք դիմել են եւ ստացել են թույլտվություն Մեղրիում անմաքս առեւտրի գոտում գործունեության համար»:
Փոխնախարարը նշեց, որ մեր հարեւանները՝ Վրաստանը, Իրանը դա արդեն ունեն եւ մեքենայով էլ Վրաստան գնալիս մարդիկ օգտվում էին այդ ռեժիմից:
Զարուհի Փոստանջյանը ցանկացավ ունենալ այն նամակագրության պատճեն, որով «Դյութի ֆրին» դիմել էր կառավարությանը: Նա նաեւ հարցրեց, թե Արցախի հետ սահմանի հետ է՞լ է գործելու այդպիսի ռեժիմ, թե՞ ոչ:
Փոխնախարարը խոստացավ պատճեները տալ: Ինչ վերաբերում է Արցախի սահմանին, նա ասաց, որ այդտեղ նուրբ պահ կա. «Մենք մաքսային ձեւակերպումներ չենք իրականացնում Արցախի հետ սահմանում, որ մի հատ էլ անմաքս առեւտրի գոտի անենք: Այն կարող ենք անել ՀՀ տարածքում: Այն հարաբերությունները, որն ունի Հայաստանը Արցախի հետ, անմաքս առեւտրի գոտու իմաստը չեմ տեսնում»:
Հռիփսիմե ՋԵԲԵՋՅԱՆ
