Քաղաքագետ Հրանտ Մելիք-Շահնազարյանը «Առավոտի» հետ զրույցում ասաց, որ մեծ կարեւորություն չի տալիս Թուրքիայի հայտարարություններին, որոնցով եղբայրական պետությունը վստահեցնում է, թե Ադրբեջանի կողքին կլինի միշտ, Հայաստանին էլ կոչ է անում վերադարձնել «Ադրբեջանի տարածքները»: «Թուրքիայի նման մոտեցումը նոր չէ: Մի քանի անգամ նման հայտարարություններ հնչել են:
Բայց այսօր այդ հայտարարությունները բավական թույլ են, որովհետեւ Թուրքիան այսօր չի կարող Ադրբեջանին երաշխիք տալ պատերազմ սկսելու եւ հաջողության հասնելու համար: Գտնվելով բավական բարդ աշխարհաքաղաքական իրավիճակում՝ իրականում Թուրքիան իր ազդեցությունն է կորցրել վերջին մեկ-երկու տարիների ընթացքում. իր ազդեցությունն է կորցրել Ղրիմում, իր դիրքերը բավական թուլացրել է Մերձավոր Արեւելքում, եւ ես չեմ կարծում, որ նման իրավիճակում Անկարան փորձի Հարավային Կովկասում հակամարտության նոր օջախ ստեղծել եւ դրա մեջ ներքաշել նաեւ Ադրբեջանին: Բաքուն, իհարկե, կարող է Թուրքիայից ինչ-որ երաշխիքներ պահանջել, բայց բոլորս էլ հասկանում ենք, որ Թուրքիան այդ երաշխիքները չի կարող տալ:
Հետեւաբար ես կարծում եմ, որ թուրքական գործոնը, որն ինչքան էլ հնարավոր ազդեցություն ունի, բայց այս պահի դրությամբ վերջին դերն է խաղում այս հակամարտության սրման գործում»,- ասաց քաղաքագետը:
Կարդացեք նաև
«Առավոտ» օրաթերթ
12.12..2015
