Ինչպես ավելի վաղ տեղեկացրել էինք, Հայաստանում ԱՄՆ դեսպանատան աջակցությամբ այսօր «Ներդաշնակության մեղեդի» խորագրով համատեղ համերգով հանդես կգան The Beautified Project ռոք-խումբը, 4 թուրք երաժիշտներ եւ ստամբուլահայ երգչուհի Սիբիլը:
Aravot.am-ը The Beautified Project-ի հիմնադիր, կիթառահար Անդրե Սիմոնյանից հետաքրքրվեց, թե ինչպես է ծագել թուրք գործընկերների հետ համատեղ ծրագրի գաղափարը: «Նկատել էի, որ Հայաստանում թուրքերի հանդեպ լարված իրավիճակ է տիրում, շատերին էլ թվում է, թե դա փոխադարձ է: Ցանկացա իրականացնել մի ծրագիր, որը կառանձնացնի հասարակ ժողովրդին քաղաքականությունից: Սովորական՝ փողոցում քայլող թուրքը հայերի հանդեպ ատելություն չունի, եւ նման գաղափար ներկայացնող ծրագրերը հեշտ է իրականացնել արվեստի միջոցով: Այդպես, թուրք երաժիշտներին առաջարկեցի մշակել մեր անգլերեն եւ հայերեն երգերը՝ օգտագործելով եվրոպական երաժշտության գործիքներ՝ կիթառ, դաշնամուր, ինչպես նաեւ՝ թուրքական ժողովրդական գործիքներ: Ի դեպ, դրանց մի մասը հայկական արմատներ ունեն: Հարեւան երկրներ ենք, շատ բան փոխկապակցված է»,-ասաց Անդրեն:
Ծրագրի երկրորդ համերգը տեղի է ունենալու դեկտեմբերի 22-ին՝ Ստամբուլում: Անդրեի խոսքով՝ Թուրքիայում որեւէ դժվարության չեն հանդիպել. «Համերգը տեղի է ունենալու Ստամբուլի կենտրոնում՝ Շիշլիքենթ հայտնի սրահում: Իշխանությունները հանգիստ թույլատրել են եւ քաջալերել մեզ: Իսկապես, մարդիկ պետք է հասկանան՝ այն, ինչ կատարվում է քաղաքականության մեջ, կապ չունի հատկապես թուրք հասարակության հետ: Ի դեպ, Թուրքիայի կառավարության ֆինանսավորմամբ թուրք երաժիշտ Յուրդալ Թոքջանը թողարկելու է Պոլսի հայ երաժիշտների ստեղծագործությունների ձայնասկավառակը: Անմտություն է ատել թուրք արվեստագետներին, որոնք քո մշակույթը ներկայացնում են իրենց երկրում»:
«Ներդաշնակության մեղեդի»-ի շրջանակում ստեղծվել է նաեւ «Ինձ մի մեղադրիր» երգը, որը գործիքավորվել է 14 գործիքներով: «Առաջիկայում Հայաստանում եւ Թուրքիայում նկարահանելու ենք տեսահոլովակը, իսկ հետո՝ վավերագրական ֆիլմը, որը պատմելու է մեր ծանոթության, գործակցության եւ համերգների մասին»,-նշեց Անդրե Սիմոնյանը:
Կարդացեք նաև
Լուիզա ՍՈՒՔԻԱՍՅԱՆ
Թուրքը մնոում է թուրք:Մի որոշ ժամանակ հետո մեր մեղեդիները կյուրացնեն և ստիպված կլինենք ապացուցելու,որ դա մերն է:Ինչու Կիսինի պես մեծ երաժիշտը հրաժարվում է Թուրքիայում ելույթ ունենալ,իսկ հայերը …Տրոյական ձիով մտնում են Հայաստան,զգույշ եղեք