Դեկտեմբերի 13-ին Ազատության հրապարակում կայացած «Նոր Հայաստան» հանրային փրկության ճակատի հերթական հավաքին «Նոր Հայաստանի» քաղաքական խորհրդի անդամ Անդրեաս Ղուկասյանը հայտարարեց, որ Կենտրոնական ընտրական հանձնաժողովի կայացրած որոշումը Հայաստանը մխրճել է խորը ճգնաժամի մեջ, որի տնտեսական եւ քաղաքական հետեւանքներն անխուսափելի են: Նրա խոսքով, նման պայմաններում քաղաքացիական շարժումը օրինական իշխանություն ձեւավորելու, իշխանության յուրացումը կասեցնելու կարեւորագույն քաղաքական գործընթաց է: «Այս շաբաթ մեկնարկող միջոցառումները նպատակ ունեն ոչ միայն համախմբելու քաղաքացիների ներուժը, քաղաքական պաշտպանություն ստեղծել քաղաքացիների համար, այլեւ նոր քաղաքական օրակարգ հասցնել, այնպես, որ քաղաքացիների համախմբումը կարեւոր հանգամանք պետք է դառնա մեր երկրում»,-ասաց Անդրեաս Ղուկասյանը:
Նա հավելեց, որ քաղաքացիական անհնազանդությունը շարունակում է մնալ կարեւորագույն գործիքը, քանի որ «Ռեժիմն ի վիճակի չի եղել բաց, թափանցիկ քննարկել հաղորդագրությունները խախտումների մասին, որ եղել են դեկտեմբերի 6-ին»: Ըստ Անդրեաս Ղուկասյանի՝ այդ կեղծիքները ձեռնոց են՝ ուղղված միջազգային հանրությանը:
Դեկտեմբերի 14-ին Ազատության հրապարակում կայանալիք հավաքին հանդես կգան Ժիրայր Սեֆիլյանն ու Գարեգին Չուգասզյանը, իսկ դեկտեմբերի 15-ին՝ Րաֆֆի Հովհաննիսյանը:
Գոհար ՀԱԿՈԲՅԱՆ
Կարդացեք նաև
