Հեռուստատեսության և ռադիոյի ազգային հանձնաժողովի անդամ Կորյուն Առաքելյանի դիտարկմամբ՝ այժմ հեռուստաընկերություններում իրավիճակը նախկինի համեմատ ավելի լավ է. «Կան հեռուստաալիքներ, որոնք սկսել են նաև գիտական, ուսումնական հաղորդումներ ցույց տալ: Բացի այդ, հիմա ցերեկային ժամերին ցուցադրվող ֆիլմերում բաց տեսարաններ չկան: Լուծման ձևերից մեկն էլ կարող է լինել կոդավորումը, այսինքն՝ կարելի է այս կամ այն հաղորդման վրա կոդ դնել, որպեսզի երեխային հասանելի չլինի»,- այսօր լրագրողների հետ հանդիպման ժամանակ ասաց Կորյուն Առաքելյանը:
Ըստ բանախոսի՝ հեռուստատեսության լրջագույն խնդիրը շարունակում է մնալ լեզվի անաղարտությունը, որը խախտվում է գրեթե ամեն օր, հատկապես սերիալներում. «Լեզվի անաղարտությունը ապահովվում է օրենքով: Սակայն երբեմն ծայրահեղ գռեհիկ են խոսում: Էժանագին ձևով հետաքրքրություն են ուզում ձեռք բերել: Ամենավատն այն է, որ չկա հստակ չափորոշիչ՝ որն է պարզապես խոսակցական և որն է խախտում օրենքը: Սա, իհարկե, լուրջ խնդիր է, որով պետք է զբաղվի ոչ միայն մեր հանձնաժողովը, այլև Լեզվի տեսչությունը»,- ասաց Կորյուն Առաքելյանը:
Սիրանուշ ՀԱՅՐԱՊԵՏՅԱՆ
