Այսօր գլխավոր դատախազ Գեւորգ Կոստանյանը ասուլիս էր հրավիրել՝ սահմանադրական հանրաքվեի ընտրախախտումների թեմայով:
Այսօր հանրության կողմից կա խորը անվստահություն իրավապահ մարմինների, դատախազության, արդարադատության համակարգի նկատմամբ, որովհետեւ մարդիկ տեսել են Մարտի 1, 10 զոհ եւ ոչ մի բացահայտում, մարդիկ տեսնում են Սուրիկ Խաչատրյանի գործերի հետ կապված տարիներ ի վեր իրավապահ մարմինների վերաբերմունքը: Ուստի Aravot.am-ը հարցրեց՝ հիմա այս ամենը հաշվի առնելով՝ ի՞նչ երաշխիք կա, որ Դուք պիտի բացահայտեք հանրաքվեի ընտրախախտումները, Դուք ի՞նչ քայլեր եք ընդհանրապես ձեռնարկում Ձեր կառույցի նկատմամբ հանրության վստահությունը բարձրացնելու ուղղությամբ, որ եթե դուք ասուլիս տաք, թվեր հրապարակեք, մարդիկ լսեն ու ասեն՝ եթե Գեւորգ Կոստանյանն է ասում, ուրեմն սա 100 տոկոսով համապատասխանում է իրականությանը:
Դատախազը պատասխանեց. «Ես հեռու եմ այն մտքից, որ մարդիկ պետք է լսեն ու ասեն՝ եթե Գեւորգ Կոստանյանն է ասում, ուրեմն սա 100 տոկոս է, բայց որպեսզի այդ մարդը համոզվի, ցանկացած մարդու տրված է այդ հնարավորությունը, առնվազն այն մարդուն, ով իրավունք ունի կասկածի տակ դնել, դրա համար կա հրապարակայնություն: Պատահական չի, որ թե՛ Սուրիկ Խաչատրյանի, թե՛ որեւէ այլ գործով, թե՛ ընտրախախտումների վերաբերյալ գործով ես պատրաստ եմ ցանկացած նյութ, գործ հաղորդում տվող եւ առնվազն տվյալ անձի փաստաբանի եւ ԶԼՄ-ների մասնակցությամբ քննարկել:
Ավելին, քան առավելագույն հաշվետվողականությունը հասարակությանը, հրապարակայնությունը գործերի քննության, էլ ի՞նչ պետք է արվի: Ես անգամ հիպոթետիկ չեմ պատկերացնում, թե էլ ի՞նչ անել, որ մարդու կողմից վստահություն լինի: Դու իրավունք ունես չվստահելու, դու իրավունք ունես չհավատալու, հարգելի՛ մարդ: Դրա համար քեզ հնարավորություն ենք տալիս ինքդ գնահատես՝ մեր ասածը համապատասխանո՞ւմ է իրականությանը, թե՞ չի համապատասխանում: Ավել մեխանիզմներ ես չգիտեմ: Եթե դուք գիտեք, ինձ ասեք: Ես վստահեցնում եմ, որ կկիրառեմ ցանկացած մեխանիզմ, որպեսզի հասարակության կողմից վստահություն լինի իրավապահ մարմինների եւ հատկապես դատախազության նկատմամբ: Միաժամանակ ես չեմ պատրաստվում եւ չեմ անի հետեւյալը՝ չեմ ենթարկի քրեական պատասխանատվության այն անձին, որի վերաբերյալ չունեմ բավարար ապացույցներ մենակ նրա համար, որպեսզի հանրային վստահություն ձեռք բերեմ: Երբե՛ք: Իմ բարոյական կերպարն ինձ թույլ չի տա, որ ես որեւէ մեկին առանց ապացույցի քրեական պատասխանատվության ենթարկեմ մենակ նրա համար, որ հասարակությունն ինձ հավատա կամ չհավատա»:
Կարդացեք նաև
Հարցին՝ Դուք ձեր անձնական եւ ձեր ղեկավարած կառույցի ներդրումը տեսնո՞ւմ եք Սուրիկ Խաչատրյանի որդու պաշտոնի նշանակման գործում՝ Գեւորգ Կոստանյանը պատասխանեց. «Իմ անձնական եւ իմ ղեկավարած կառույցի ներդրումը բացառապես հանցագործություն բացահայտելու եւ մեղավոր անձանց պատասխանատվության ենթարկելու մեջ եմ տեսնում»:
Դիտարկմանը՝ իսկ որ նա դուրս է մնացել այդ շրջանակից՝ Գեւորգ Կոստանյանն արձագանքեց. «Իսկ ո՞վ է ասում, որ նա այդ շրջանակի մեջ եղել է: Քրեական գործը քննում է փաստի կապակցությամբ, որպես մեղադրյալ ներգրավում են այն անձանց, ում վերաբերյալ կան բավարար ապացույցներ»:
Հռիփսիմե ՋԵԲԵՋՅԱՆ
