Սահմանադրական հանրաքվեի ժամանակ ՕԵԿ վստահված անձինք շատ պասիվ էին եւ հասարակությունն ակտիվ քննարկում էր, որ նրանք ծախված են: Այս առնչությամբ այսօր ԱԺ ճեպազրույցների ժամանակ լրագրողների հարցին ՕԵԿ պատգամավոր Մհեր Շահգելդյանը պատասխանեց. «Մենք մեր տեղերը չենք ծախել, դա մեզ համար անընդունելի է: Իսկ, եթե նման տեղեկություններ ունեք, մենք պատրաստ ենք կիրառել միջոցներ: Մեր մոտեցումն այն է, որ մեր վստահված անձինք կատարել են իրենց աշխատանքը»:
Դիտարկմանը, որ «Ոչ»-ի ճակատը, «Նոր Հայաստանը» պայքարում են հանրաքվեն անվավեր ճանաչելու համար, իսկ «Հայկական վերածնունդը» որեւէ քայլ չի անում, պասիվ է՝ Մհեր Շահգելդյանը պատասխանեց. «Մենք բազմաթիվ դիմումներ ենք ներկայացրել եւ համագործակցում ենք մեր ընդդիմադիր գործընկերների հետ: ՕԵԿ-ն արդեն իսկ արել է հայտարարություն, որտեղ խոսվում է բոլոր ընտրախախտումների մասին»: Նա ասաց, որ «Հայկական վերածնունդը» դեռ պետք է նիստ անի եւ որոշի հետագա քայլերը:
Հռիփսիմե ՋԵԲԵՋՅԱՆ
