ՀՀ ԱԺ ՀԱԿ խմբակցության ղեկավար Լևոն Զուրաբյանը քիչ առաջ ներկայացրեց 2/32 ընտրատեղամասի վերահաշվարկի արդյունքները: «Մեդիա կենտրոնում» հրավիրված քննարկմանը պարոն Զուրաբյանը հայտնեց, որ իրենց դժվարությամբ է հաջողվել հասնել վերահաշվարկի, քանի որ ՀՀԿ-ն այս հարցում էլ է դիմել խարդախության. մի քանի տասնյակ վերահաշվարկներ է ներկայացրել, հետո կեղծել վիճակահանությունը, որ հերթը ՀԱԿ-ին չհասնի:
Ի վերջո, հաջողվել է, ու Լևոն Զուրաբյանը մանրամասնեց. «Այդ տեղամասում պարզվել է, որ ցուցակներում հարյուրավոր անձնագրերի համարներ նշված են մեկ կամ երկու թիվ ավելի շատ, քան ստանդարտ համարների թիվն է անձնագրերի: Ուստի դրանք բոլորը կեղծ թվեր են, մարդիկ ուղղակի նստել՝ շտապողականության մեջ լրացրել են: Մասշտաբային լցոնում և փաստաթղթերի կեղծում. նույնն է վիճակն ամենուրեք, որտեղ «այո»-ն հաղթել է:
Այնուհետև պարոն Զուրաբյանը ներկայացրեց ֆիզիկոս, ընտրական գործընթացների վիճակագրական հետազոտությունների մասնագետ Սերգեյ Շպիլկինի հետազոտությունը հանրաքվեի քվեարկության վերաբերյալ, որը ցույց է տալիս, որ հանրաքվեն կեղծվել է:
Լևոն Զուրաբյանն այս առիթով ասաց. «Որքան էլ Տիգրան Մուկուչյանն ու Սերժ Սարգսյանի կեղծարարության բանդան կեղծեն, թվեր փոխեն, միևնույն է նրանք չեն կարող հանրաքվեի նորմալ պատկեր ստեղծել, քանի որ մաթեմատիկայի պարզ կանոնները թույլ են տալիս ճիշտ ու սխալ քվեարկությունները տարբերել: Սա ճշմարիտ գիտություն է, հասկանում եմ, որ Էդուարդ Շարմազանովը պատմության դասագրքերից բացի այլ բան չի կարդացել, բայց միգուցե լավ կլինի՝ ինքն էլ փորձի այս մեթոդներին ծանոթանալ և հասկանալ վերջապես, որ գոյություն ունեն մաթեմատիկական ճշգրտության ապացույցներ»:
Կարդացեք նաև
Վերլուծությունը ցույց է տալիս, որ ցածր մասնակցությամբ տեղամասերում «ոչ»-ը միշտ հաղթել է, հետո գնալով ինչքան մասնակցությունը բարձրանում է, «այո»-ն թռիչքաձև վերելք է ունենում:
Կատարված վերլուծության հիման վրա պարոն Զուրաբյանը հայտարարեց հանրաքվեի՝ իրենց համար իրական արդյունքները. «Վերլուծությունը ցույց է տալիս, որ ոչ իրական ձայները կազմում են 485 հազար: Ուստի հանրաքվեին մասնակցել է մոտ 825 հազար մարդ, որոնցից մոտ 575 հազարը քվեարկել են «ոչ», 250 հազարը՝ «այո»: Սա ամենալավատեսական սցենարն է այո-ականների համար: Ուստի տեղի է ունեցել մասսայական, կոպտագույն ոտնահարում հայ ժողովրդի կամարտահայտության: Գլխիվայր շուռ է տրվել հանրաքվեի իրական արդյունքը»:
Տաթև ՀԱՐՈՒԹՅՈՒՆՅԱՆ
Լուսանկարը՝ «Մեդիա կենտրոն»-ի
