«Այս հանրաքվեի ընթացքում շատ հետեւողական արձագանք է կատարվում իշխանությունների կողմից բոլոր տեղեկատվություններին,որոնք կապված են խախտումների հետ: Հետաքննվում են բոլոր տեղեկատվությունները: Որտեղ կան ակնհայտ հիմքեր, անմիջապես քրգործեր հարուցվեցին: Քրգործերը վերաբերում են ե՛ւ լրագրողների գործողությունները խոչընդոտելու դրվագներին, նաեւ քվեարկության իրավունքի վերաբերյալ խախտումներին, այսինքն, մեկից ավելի անձանց քվեարկության կամ ուրիշի փոխարեն քվեարկելու դեպքերին»,- այսօր ՀՀԿ գործադիր մարմնի նիստից հետո լրագրողների հետ զրույցում անդրադառնալով հանրաքվեի խախտումներին՝ ասաց ՀՀԿ ԳՄ անդամ, ԱԺ փոխխոսնակ Հերմինե Նաղդալյանը:
Երբ լրագրողները հարցրեցին, թե ինչպես է վերաբերվում ԱՄՆ Պետդեպարտամենտի եւ ԵՄ-ի հայտարարություններին` տիկին Նաղդալյանն ասաց. «Այդ կոչերը, որը կար, պարզապես մեր իսկ գործողություններին համահունչ կոչ է: Նման կոչերի կարիքն էլ բացարձակապես չի զգացվում, ակտիվ, հետեւողական աշխատանքները կատարվում են, արդյունքները կտեսնեք դրա վերաբերյալ»:
Նա լրագրողների դիտարկմանն ի պատասխան՝ ճշտեց, որ ԵԽԽՎ-ն զեկույց չի հրապարակել հանրաքվեի վերաբերյալ ու չի հրապարակելու. «Միայն դիտորդական առաքելություններն են, որ զեկույց են հրապարակում: Մենք տվյալ դեպքում ունեցել ենք ԵԽԽՎ պատվիրակների ներկայություն, այդ ներկայությունը հրապարակել է իր մամուլի հաղորդագրությունը, որը եղել է բավականին սահմանափակ տեղեկատվությամբ, որովհետեւ ընդամենը 3 պատվիրակ ու ընդամենը 2 օր են եղել ՀՀ-ում, չեն ունեցել հնարավորություն ծանոթանալու մեր օրենսդրությանը, ոչ էլ այն հիմքերին, որի հիման վրա կազմակերպվում է ընտրական գործընթացը: Մենք ԵԽԽՎ-ին պետք է ներկայացնենք տեղեկատվություն մեր օրենսդրական հիմքերի մասին, տեղեկատվություն բողոքների հետ կապված եւ դրանց հիման վրա պատվիրակները կներկայացնեն իրենց տեղեկատվությունը, այսինքն, զեկույց չի ներկայացվելու»:
Հետո Հերմինե Նաղդալյանը հիշեցրեց. «Բոլորովին վերջերս ԵԽԽՎ-ն ներկայացրեց իր զեկույցները Ադրբեջանի, Թուրքիայի ընտրությունների վերաբերյալ, դա պարզապես կարդալու թեմա է, որ տեսնեք, թե ինչ գնահատականներ են»:
Կարդացեք նաև
Հռիփսիմե ՋԵԲԵՋՅԱՆ
