«Նոր Հայաստան» հանրային փրկության ճակատի՝ այսօրվա տեղեկատվական հավաքի ընթացքում մամուլի խոսնակ Վարուժան Ավետիսյանը տեղեկացրեց, որ կեսօրին երիտասարդները ցանկացել են Ազատության հրապարակում վրան տեղադրել, սակայն ոստիկանությունը նրանց թույլ չի տվել և բռնությամբ բերման ենթարկել: Այնուհետև որոշ պարզաբանումներ ներկայացրեց այն շահարկումների հետ կապված, թե իբր «Նոր Հայաստան» ճակատի հանրահավաքները սակավամարդ են:
Պարոն Ավետիսյանը հայտարարեց. «Մինչ այժմ «Նոր Հայաստան» ճակատն անցկացրել է տեղեկատվական հավաքներ, այլ ոչ թե հանրահավաք: Հանրահավաքը տեղի է ունենալու վաղը՝ ժամը 17.00-ին»:
«Նոր Հայաստան» հանրային փրկության ճակատի քաղաքական խորհրդի անդամ Գարեգին Զուգասզյանը հայտարարեց, թե միջազգային մամուլն արդեն սկսել է գրել հայաստանյան արմատական ընդդիմության գոյության մասին: Նաև փաստեց, որ միջազգային մամուլում օրեցօր ավելանում է այնպիսի հրապարակումների թիվը, որոնցում կարծիք է հայտնվում, որ «ՀՀ-ում տեղի ունեցածը ժողովրդի կամքի բռնաբարում էր»:
Այնուհետև պարոն Զուգասզյանը մտահոգություն հայտնեց, թե աշխարհում խոսվում է Կարսի և Սևրի պայմանագրերի մասին, ինչը աշխարհաքաղաքական լուրջ տեղաշարժ է, որին պետք է պատրաստ լինի Հայաստանը. «Դրա համար անհրաժեշտ է, որ ՀՀ-ում լինի յուրային իշխանություն: Մենք իրավունք չունենք պատահական արկածախնդիրներին թույլ տալ, որ ՀՀ-ում ադմինիստրացիա անեն, հատկապես այն պատճառով, որ գործ ունենք քաջ նազարների ռեժիմի հետ»:
Կարդացեք նաև
«Նոր Հայաստան» հանրային փրկության ճակատի քաղաքական խորհրդի անդամ Ադրիաս Ղուկասյանը նկատեց, թե դեկտեմբերի 7-ից հետո Սերժ Սարգսյանը փորձում է իրավիճակն այնպես ներկայացնել հանրությանը, իբր հանրաքվեի արդյունքները ամփոփված ու ավարտուն են, և այդ գործընթացն արդեն հասել է արդյունքի: Սակայն պնդեց, որ իրականում դա այդպես չէ. «Դեկտեմբերի 6-ի գիշերը ԿԸՀ-ի մոտ քաղաքացիների համարձակ գործողություններից հետո սկսվեց այս կեղծված հանրաքվեի ապալեգիտիմացման գործընթացը, դեկտեմբերի 7-ին լսեցինք միջազգային դիտորդների խիստ ու բացասական գնահատականը, որ հանրաքվեն չի արտահայտում ժողովրդի կամքը: Մի խոսքով՝ Սերժ Սարգսյանին ու իր խմբին բռնացրել են հանցագործություն կատարելու վրա»:
Անդրիաս Ղուկասյանի հավաստմամբ՝ կեղծիքներն ուղղորդվում ու կազմակերպվում էին մեկ կենտրոնից՝ ՀՀԿ-ի «այո»-ի շտաբից: Այդ պատճառով իրենք ոչ թե պահանջում են տեղական հետաքննություն, այլ միջազգային. «Մենք այս գործընթացը դիտարկում ենք որպես հայ ժողովրդի ինքնորոշման իրավունքի խախտում, ինչը միջազգային իրավունքի խախտում է»: Իր ելույթի ավարտին Անդրիաս Ղուկասյանը հայտարարեց, թե «մեր ճակատը պինդ է, և այն պատը, որ իրենք ստեղծել են ժողովրդի զարգացման ճանապարհին, այդ ճակատով քանդելու ենք»:
Տաթև ՀԱՐՈՒԹՅՈՒՆՅԱՆ
