Հայաստանի Հանրապետության աշխատանքի և սոցիալական հարցերի նախարարությունը` առաջնորդվելով գործընկերության իրավահավասարության և փոխադարձ վստահության սկզբունքներով, հանդես է գալիս Ազգային մակարդակում սոցիալական համագործակցության համաձայնագրի շուրջ միավորվելու նախաձեռնությամբ:
Հաշվի առնելով ինտեգրված սոցիալական ծառայությունների ներդրման գործընթացում պետական, համայնքային և ոչ պետական կազմակերպությունների ու անհատների դերն ու նշանակությունը` նախարարությունը կարևորում է նրանց հետ համագործակցության նոր ձևաչափի ամրագրումը:
Համաձայնագրի շրջանակներում փորձ է արվելու ինստիտուցիոնալ նոր հարթության վրա դնել սոցիալական համագործակցության ավանդական փոխհարաբերությունները և ընդլայնել գործընկերների շրջանակը:
Նախարարությունը ակնկալում է գործընկերների ակտիվ մասնակցությունը սոցիալական աջակցության բնագավառում պետական քաղաքականության մշակման, իրականացման և մոնիթորինգի գործընթացներում:
Կարդացեք նաև
Համաձայնագրի առանցքում իբրև հիմնարար սկզբունք դրված է սոցիալապես խոցելի մարդու օժանդակումը, որի արդյունավետությունը իրատեսական է սոցիալական գործընկերության մշակույթի զարգացման և արմատավորման դեպքում միայն:
Նախարարությունը սահմանել է համաձայնագրի միացման և դուրս գալու պարզ ընթացակարգ:
Ազգային մակարդակում սոցիալական համագործակցության համաձայնագրին կարող եք ծանոթանալ ՀՀ աշխատանքի և սոցիալական հարցերի նախարարության պաշտոնական կայքէջում:
ՀՀ աշխատանքի և սոցիալական հարցերի նախարարության հասարակայնության հետ կապերի բաժին
