Այսօր Ազատության հրապարակում կայացավ հանրահավաք՝ նվիրված Մարդու իրավունքների պաշտպանության միջազգային օրվան: Հանրահավաքը հրավիրել էր ՀԱԿ կուսակցությունը, մասնակցում էին նաեւ Նոր Հայաստան միավորման լիդերները, ԱԻՄ առաջնորդ Պարույր Հայրիկյանը:
Հանրահավաքում ՀԱԿ խորհրդարանական խմբակցության ղեկավար Լեւոն Զուրաբյանը նախ անդրադարձավ դեկտեմբերի 6-ին կայացած Սահմանադրական բարեփոխումների ընթացքին, դատապարտեց կեղծիքները, խոսեց միջազգային կառույցների տված բացասական գնահատականների մասին, նա հայտարարեց, որ այդ օրը Հայաստանի իրականության մեջ կարելի է ամրագրել իբրեւ՝ Լրագրողների դեմ բռնության օր:
Ելույթի ավարտին Լեւոն Զուրաբյանը քաղհասարակությանը եւ քաղաքական ուժերին կոչ արեց՝ պայքարը համատեղ շարունակել, ստեղծել «ազնվության բանակներ»:
Լեւոն Զուրաբյանն ասաց, որ իրենք լուրջ ծրագիր ունեն եւ 2017-ին կայանալիք խորհրդարանական ընտրություններում հասնելու են նրան, որ յուրաքանչյուր տեղամասում «ազնվության բանակի մարտիկներ լինեն՝ կամերաներով» եւ անընդմեջ հեռարձակում ապահովեն տեղամասերից:
Կարդացեք նաև
Զուրաբյանի ելույթից հետո հանրահավաքի մասնակիցները երթով շարժվեցին դեպի Կենտրոնական ընտրական հանձնաժողով, երթը ընթանալու է Մաշտոց- Սայաթ-Նովա- Տերյան- Կորյուն երթուղով:
Նելլի ԳՐԻԳՈՐՅԱՆ
