ԵԱՀԿ մամուլի ազատության հարցերով ներկայացուցիչ Դունյա Միյատովիչն այսօր մտահոգություն է հայտնել Հայաստանում դեկտեմբերի 6-ին անցկացված Սահմանադրական փոփոխություններին հանրաքվեն լուսաբանող լրագրողների աշխատանքի խոչընդոտումների եւ նրանց նկատմամբ հնչած սպառնալիքների փաստերով: Այս մասին տեղեկանում ենք ԵԱՀԿ մամուլի հաղորդագրությունից:
Դունյա Միյատովիչը, մասնավորապես, առանձնացրել է iLur.am կայքի լրագրող Ռաֆայել Աֆրիկյանի, «Ազատություն» ռադիոկայանի լրագրող Անուշ Մկրտչյանի եւ Hetq.am կայքի լրագրող Դիանա Ղազարյանի դեպքերը:
«Ես կոչ եմ անուշ իշխանություններին մանրակրկիտ ուսումնասիրել լրագրողների իրավունքների խախտումների վերաբերող բոլոր միջադեպերը: Լրատվամիջոցների ներկայացուցիչների նկատմամբ բռնությունների անպատժելիությունը չի կարելի հանդուրժել»,- ասել է նա:
Դունյա Միյատովիչն ընդգծել է, որ լրագրողները իրավունք ունեն լուսաբանելու հանրային իրադարձությունները եւ ավելացրել, որ դա պետք է արվի ազատ եւ անվտանգ մթնոլորտում:
Կարդացեք նաև
ԵԱՀԿ-ն հիշեցրել է, որ այս տարվա հունիսին Դունյա Միյատովիչը կոչ էր արել իշխանություններին հետաքննել Բաղրամյանի ցույցերի ընթացքում լրագրողների նկատմամբ բռնի գործողությունները ոստիկանների կողմից. «Հետաքննության արդյունքներն այս պահին դեռ չեն ներկայացվել»:
Պատրաստեց Աշոտ ԻՍՐԱԵԼՅԱՆԸ
