ՀՀ բնապահպանության նախարարի տեղակալ Խաչիկ Հակոբյանի ղեկավարած պատվիրակությունը ՀՀ Սյունիքի մարզի Ագարակ քաղաքում աշխատանքային հանդիպում է ունեցել Իրանի Իսլամական Հանրապետությունից ժամանած պատվիրակության հետ, որը գլխավորել է ԻԻՀ էներգետիկայի նախարարի գլխավոր խորհրդական Հոմայուն Հայերին:
Երկու երկրների պատվիրակությունները համատեղ շրջայց են կատարել Ագարակի պղինձ-մոլիբդենային կոմբինատում, դիտարկել այնտեղ գործող ջրի շրջանառու համակարգը, ծանոթացել արտադրական և տեխնոլոգիական փուլերին: ԻԻՀ պատվիրակությունը տպավորված է եղել կոմբինատում իրականացված աշխատանքներով:
Շրջայցին հաջորդած աշխատանքային հանդիպմանը, քննարկվել են Ագարակի պղինձ-մոլիբդենային կոմբինատում մինչև 2017թ. ջրի լիարժեք շրջանառու համակարգի անցնելու հնարավորությունները: Կարևորվել են Արաքս գետի ջրի որակի համատեղ մշտադիտարկման հարցերը: Քննարկվել են նաև երկկողմ հետաքրքրություն ներկայացնող բնապահպանական մի շարք հարցեր` երկու պետությունների սահմանին Բարեկամության այգի ստեղծելու, էկոմիջանցքներ ձևավորելու ուղղությամբ կատարվող քայլերը:
Կողմերը գոհունակությամբ փաստել են հանդիպման ժամանակ ձեռք բերված արդյունքները և նախանշել համագործակցության հեռանկարները:
ՀՀ բնապահպանության նախարարություն
