«Իշխանականների 25%-ը դեմ է քվեարկել, «Բարգավաճը» կոչ արեց «այո» ասել, էլ ի՞նչ իշխանություն-ընդդիմություն պայքարի մասին է խոսքը: Սա քաղաքական դիրքերի պայքար է: Հանրաքվեով իշխանություն-ընդդիմություն պայքար չեն անում»,-այսօր լրագրողների հետ հանդիպման ժամանակ, խոսելով սահմանադրական բարեփոխումների հանրաքվեի արդյունքներից՝ ասաց սոցիոլոգ Ահարոն Ադիբեկյանը:
Նրա անցկացրած հարցումների համաձայն՝ ընտրողների 55-60%-ը կանայք են, իսկ յուրաքանչյուր 4-րդ ընտանիքում տղամարդ չկա կամ երկրում չէ. «Մի հատ հասկացեք՝ ընտրողն ով է, ձեր համար խրտվիլակ եք սարքել: Գրագետ ընտրողների 30%-ը չի իմացել՝ ինչ հանրաքվեի մասին է խոսքը, բայց գնացել է ընտրելու: Իշխանական թեւն էլ ցույց տվեց, որ իր կազմակերպչական ռեսուրսը բացարձակ է»:
Ահարոն Ադիբեկյանն ասաց, որ դեկտեմբերի 6-ի դեպքում եւս «ընտրելու մշակույթում» առաջընթաց չի գրանցել. «Մարդկանց 20%-ը ծայրահեղ աղքատ է, միայն 10%-ն է լավ ապրում, մնացածը խնդիրներ ունեն: Այս պայմաններում դեմոկրատիա եք ուզո՞ւմ: Գյուղերում ինչ էլ տաս՝ կգնան ընտրելու: Բացի այդ, գյուղապետի որոշումից են կախված: Ամեն 10-րդ հարցվածն ասում է՝ եթե վճարեն, կմասնակցեմ հանրաքվեին: Նման իրավիճակում արդար եւ թափանցիկ ընտրություններ հնարավոր չեն»:
Սոցիոլոգի տվյալներով՝ ընտրազանգվածի 60%-ի խոսքով՝ նոր Սահմանադրությունը օգուտ կտա իշխանականներին, ինչի հետ համաձայն չէ 20%-ը:
Կարդացեք նաև
Լուիզա ՍՈՒՔԻԱՍՅԱՆ
