Ալլան ընդամենը 6 տարեկան է, բայց այս վեց տարիների ընթացքում երեխան արդեն աչքի լույսը վերականգնելու 8 վիրահատություն է տարել: Ալլան տեսողությունից զրկվել է նորածին ժամանակ: Պետերբուրգցի բժիշկները 8-րդ վիրահատությունից հետո հույս էին տվել, որ երեխան տեսնելու է, սակայն վիրահատությունից երեք տարի անց կրկին Ալլային շտապ վիրահատելու անհրաժեշտություն էր առաջացել: Քանի որ վիրահատությունը շատ բարդ է, 9-րդ անգամ էլ Ալլայի վիրահատությունը պետք է կատարվի Սանկտ Պետերբուրգի կլինիկայում, որի համար մի քանի հազար դոլար կպահանջվի:
Սակայն երեխայի ընտանիքը, որն ամեն անգամ Ալլային վիրահատության էր տարել ամեն տարի մշակած խաղողից եւ այլ բերքից ստացած գումարներով ու բարերարների օգնությամբ, այս անգամ կանգնել էր լուրջ խնդրի առաջ, քանի որ, ըստ պայմանավորվածության, նրանց խաղողը մթերած ընկերությունը գումարները պետք է վճարեր եկող տարվա ապրիլին:
«Առավոտն» այս մասին 26.11.2015 թ.-ին «Խաղողի գումարները չեն կարողանում վերցնեն, որ փոքրիկին վիրահատության տանեն» վերնագրով հրապարակում էր պատրաստել: Հոդվածին արձագանքեց ՀՀ վարչապետը՝ խաղողի մթերմամբ զբաղվող տնտեսվարողի հետ լուծելով գումարի հարցը: Ալլայի ընտանիքն ապրում է Արմավիրի մարզի Սարդարապատ գյուղում: Ալլայի տատիկի՝ Ալվարդ Սահակյանի խոսքերով, ընկերության ղեկավարը կանչել է եւ մթերված խաղողի գումարները վճարել. «Գործարանի տնօրինությունը մեկ շիշ լավ կոնյակ նվիրեց՝ ասելով, որ տանենք Ալլային վիրահատող պրոֆեսորին»:
Կիրակի օրը Ալլան մեկնեց վիրահատության:
ԼՈՒՍԻՆԵ ԲՈՒԴԱՂՅԱՆ
Կարդացեք նաև
«Առավոտ» օրաթերթ
08.12..2015
