Տավուշի մարզի Բագրատաշեն գյուղի բնակիչ, 1964 թ. ծնված Գագիկ Մխիթարյանին մաքսանենգության մեղադրանք է ներկայացվել: Ըստ առաջադրված մեղադրանքի`նա 2015թ.հուլիսի 16-ին Վրաստանում, չպարզված հանգամանքներում, ձեռք է բերել ընդհանուր 60 կգ քաշով ռազմական նշանակության արտադրանք չհամարվող «Սոկոլ» տեսակի անծուխ վառոդ հանդիսացող պայթուցիկ նյութ և նույն օրը, ժամը 20:00-ի սահմաններում այդ պայթուցիկ նյութը մաքսային հսկողությունից թաքցնելու եղանակով, տեղափոխման համար սահմանված հատուկ կանոնները խախտելով` Բագրատաշենի մաքսակետով տեղափոխել է Հայաստանի Հանրապետություն: Սակայն նա նույն օրը հայտնաբերվել է ՀՀ ֆինանսների նախարարության նախաբացթողումային հսկողության վարչության աշխատակիցների կողմից:
Գագիկ Մխիթարյանին մեղադրանք է առաջադրվել ՀՀ քրեական օրենսգրքի 215 հոդվածի 2-րդ մասով: Ըստ «Դատալեքս» դատական տեղեկատվական համակարգի` Գ, Մխիթարյանը կալանավորվել եւ գտնվում է «Նուբարաշեն» քրեակատարողական հիմնարկությունում: Գագիկ Մխիթարյանի դատավարությունը Տավուշի մարզի առաջին ատյանի դատարանում մեկնարկել է այսօր՝ դեկտեմբերի 8-ին: Հետաքրքիր է` 60 կգ պայթուցիկ նյութը բագրատաշենցի գործարար Գագիկ Մխիթարյանին ինչո՞ւ էր հարկավոր, որ այն մաքսանենգությամբ ներկրել է Վրաստանից:
Ոսկան ՍԱՐԳՍՅԱՆ
