Ճարտարապետության եւ շինարարության Հայաստանի ազգային համալսարանին այսօր առաջինը տրվեց միջազգային ինստիտուցիոնալ հավաստագրման վկայական: Բուհում կազմակերպված միջոցառման ժամանակ Ֆրանսիայի բարձրագույն կրթության հետազոտության գնահատման բարձր խորհուրդը, Իսպանիայի որակի գնահատման եւ հավաստագրման ազգային գործակալությունը ՃՇՀԱՀ-ին հանձնեցին համապատասխան վկայականը՝ 5 տարի ժամկետով:
«Շատ ուրախ եմ տարիներ առաջ մեկնարկած գործընթացի պտուղները տեսնելու համար: Հայաստանը միջազգայնացնում է կրթական համակարգը՝ լինելով եվրոպական բարձրագույն կրթական տարածքի մաս: Հայաստանյան բուհերը հետեւողական ջանքեր են գործադրել, որպեսզի կրթության որակը բարելավեն: Այս հավատարմագիրն առաջինն է, որ տրվել է Հայաստանի որեւէ պետական բուհի՝ որակի հսկողության եվրոպական գործակալությունների կողմից: Կրկնակի ուրախալի է, որ այդ գործակալությունը ֆրանսիական է: Սա մեր կատարած աշխատանքի բարձր գնահատականն է: Սա կրթության որակի եվրոպական կնիքն է՝ դրված համալսարանի վրա: Սա դիպլոմի ճանաչման եւ երիտասարդ կադրերի լավ ապագայի հիմքն է»,-լրագրողներին ասաց Կրթության եւ գիտության նախարարը:
Արմեն Աշոտյանի խոսքով՝ երբեմն բուհերից դժգոհ ենք ավելի, քան պետք է. «Փոքր-ինչ տառապում ենք ինքնաքննադատության մոլուցքով, փոքր-ինչ մազոխիստիկ բաներ կան այս ամենի մեջ, բայց Եվրոպայի առաջատար գործակալության կողմից տրված անկախ գնահատականի մասին է խոսքը»:
Կարդացեք նաև
Կրթության նախարարը հույս հայտնեց, որ այլ բուհեր եւս կգրանցեն համալսարանի հաջողությունը. «Վստահ եմ, որ մոտակա երկու տարում մենք կտեսնենք առնվազն 2-3 միջազգային հավաստագիր ստացած բուհ: Կուզեի մնացած բուհերն էլ նախանձախնդիր լինեին եւ գնային այդ ճանապարհով: Պոլիտեխնիկն արդեն որոշել է դիմել, իսկ Բժշկական համալսարանն աշխատում է բելգիական ընկերության հետ»:
Հավելենք, որ համալսարանի ինստիտուցիոնալ գնահատման գործընթացը միջազգային կառույցներն իրականացրել են 2013-2014թթ.՝ հաստատելով, որ ՃՇՀԱՀ-ի գործունեությունը համապատասխան է եվրոպական չափանիշներին:
Լուիզա ՍՈՒՔԻԱՍՅԱՆ
