Կենտրոնական ընտրական հանձնաժողովն արդեն հրապարակել է Հայաստանում դեկտեմբերի 6-ին անցկացված Սահմանադրական փոփոխությունների հանրաքվեի ընթացիկ արդյունքների նախնական ցուցանիշն ըստ տեղամասերի:
Տվյալների ուսումնասիրությունից պարզ դարձավ, որ 1997 տեղամասերից մի քանիսում հանրաքվեին մասնակցած քաղաքացիները միայն «այո» են քվեարկել:
Օրինակ՝ Ռուբիկ Աբրահամյանի ղեկավարած Արարատի մարզի Վարդաշատ համայնքում տեղակայված 18/48 ընտրատեղամասում ընտրությանը մասնակցելու իրավունք ունեցած 143 հոգուց քվեարկել է 127-ը եւ բոլորն «այո» են ասել Սահմանադրական փոփոխություններին:
Վայոց Ձորի մարզի (մարզպետ Հարություն Սարգսյան) Գնդեվազ համայնքում տեղակայված 39/53 ընտրատեղամասում ընտրության մասնակցելու իրավունք ունեցող 645 անձանցից 513-ը կողմ են արտահայտվել իշխող կուսակցության նախաձեռնած բարեփոխումներին: 4 քվեաթերթիկ էլ անվավեր է ճանաչվել:
Կարդացեք նաև
Միայն «այո» ասած ընտրատեղամասերն ամենաշատը Սուրիկ Խաչատրյանի ղեկավարած Սյունիքի մարզում են: Ուսումնասիրության արդյունքում արձանագրեցինք 6 այդպիսի տեղամաս:
Այս մարզի Ներքին Խնձորեսկ համայնքում տեղակայված 37/30 ընտրատեղամասում գրանցված 845 հոգուց 823-ն են մասնակցել քվեարկության եւ բոլորն «այո» են քվեարկել: 1 քվեաթերթիկ էլ անվավեր է ճանաչվել: 37/43 ընտրատեղամասում (Քաշունի համայնք) գրանցված 20 հոգուց 18-ը մասնակցել եւ «այո» են քվեարկել:
Թանհատ համայնքում տեղակայված 37/56 ընտրատեղամասում գրանցված 38 հոգուց 22-ը կրկին մասնակցել եւ «այո» են քվեարկել: Նույն պատկերն է Գորիս ՔԿՀ-ում (37/77). բոլոր ազատազրկվածներն «այո» են ասել:
Խնդրանզում տեղակայված 38/31 ընտրատեղամասում հանրաքվեին մասնակցել են 43 հոգի. 42-ն «այո»-ի օգտին են քվեարկել, 1 քվեաթերթիկ էլ անվավեր է ճանաչվել: Իսկ Գուդեմնիսի 38/69 ընտրատեղամասում հանրաքվեին մասնակցած 28 անձինք միաձայն կողմ են արտահայտվել խորհրդարանական կառավարման համակարգին:
Աշոտ ԻՍՐԱԵԼՅԱՆ
