«Չգիտեմ, թե ինչ հիմքով է արվում, կամ ինչ դատողություններ են արվում, տարաբնույթ գնահատականներ կարող են հնչել»,- դեկտեմբերի 7-ին լրագրողների հետ զրույցում ասաց Հանրաքվեի կենտրոնական հանձնաժողովի նախագահ Տիգրան Մուկուչյանը՝ անդրադառնալով ԱԺ պատգամավոր Լեւոն Զուրաբյանի հայտարարությանը:
Հիշեցնենք՝ Լեւոն Զուրաբյանը հայտարարել էր, որ ընտրակեղծիքների ծավալը հասնում է կես միլիոն ձայնի. «Իշխանությունները մի շա՜տ խղճուկ պրոպագանդիստական պրիյոմի են դիմել, հնարքի են դիմել։ Նրանք հիմա հայտարարում են իրենց համար լավ արդյունք ունեցող տեղամասերի արդյունքները, ըստ որի՝ 80 հազար հավաքել է «այո»-ն, 20-հազար «ոչ»-ը»:
Տիգրան Մուկուչյանը նշեց, որ այդ հանգամանքները նախ պետք է փաստական հիմք ունենան, եթե ներկայացնեն այդ փաստական հիմքերը, ապա բոլոր նման հայտարարությունները կքննարկվեն եւ իրավական դիրքորոշումներ կլինեն. «Իսկ քաղաքական մոտեցումներ, գնահատականներ եւ այլն, միշտ էլ հնչել են, կարող են հնչել: Ես համարում եմ իրավական ընթացակարգը պատշաճ, երբ ներկայացվում է համապատասխան դիմում-բողոք, որովհետեւ դրանք են «Հանրաքվեի մասին» օրենքի եւ Ընտրական օրենսգրքի տարրական պահանջները»:
Ամի ՉԻՉԱԿՅԱՆ
