«Ոչ մեր թիմը, ոչ մեր ժողովուրդը մեզ չէր հասկանա, եթե մենք այս վիճակում, կարծես թե, ոչինչ չէր եղել, նստեինք իրենց հետ օրենքներ քննարկեինք: Կատարվել է ահավոր մի բան` ժողովրդի կամքի բռնաբարություն, ոտնահարվել է ժողովրդի կամքը»,- խորհրդարանում, լրագրողների հետ զրույցում ասաց ՀԱԿ խմբակցության ղեկավար Լեւոն Զուրաբյանը` անդրադառնալով ՀԱԿ-ի կողմից խորհրդարանի լիագումար նիստերի այս նստաշրջանի հետագա աշխատանքների բոյկոտին:
«Դժվար է, կատարվածից հետո նստել նույն դահլիճում, շփվել մարդկանց հետ, ովքեր կրում են այս կատարված, չեմ հապաղի ասել, ոճրագործության համար ամբողջ պատասխանատվությունը»,- հավելեց Լեւոն Զուրաբյանը:
ՀԱԿ-ում կարծում են, որ «ժողովուրդն աներկբա «ոչ» է ասել» իսկ հանրաքվեի արդյունքները կեղծվել են «անխնա կերպով», որտեղ կիրառվեց «ապօրինությունների ամբողջ զինանոցը»:
Ի պատասխան լրագրողների հարցերի՝ Լեւոն Զուրաբյանն ասաց, որ ՀԱԿ-ը պատրաստվում է հրապարակել ընտրակեղծիքների մասին փաստեր` սահմանված ժամկետներում:
Կարդացեք նաև
Հիշեցնենք, որ Լեւոն Զուրաբյանը հայտարարել էր կես միլիոն կեղծված ձայների մասին: «Փաստերը ծով են: Ինչ վերաբերում է կես միլիոն ձայների կեղծմանը, շատ դժվար է եւ ոչ ոք չի կարող ձեզ հիմա հստակ տվյալ տալ, թե քանի ձայն է կեղծվել: Խոսքը մոտավոր գնահատականի մասին է»,- ասաց նա`հավելելով, որ այդ թիվը կարող է ստանալ ցանկացած մարդ, ով Հայաստանի ժողովրդագրական տվյալները կվերլուծի:
Լեւոն Զուրաբյանը դա արեց`սկսած 1995-ի սահմանադրության հանրաքվեից, երբ Հայաստանում դեռ ավելի շատ բնակչություն կար եւ ժողովուրդն էլ քաղաքականապես ակտիվ էր: Երբ «Ազատություն» ռադիոկայանի լրագրողը խնդրեց ապացուցողական բազա ներկայացնել, Լեւոն Զուրաբյանը խորհուրդ տվեց դիտել «Ազատություն» ռադիոկայանի եթերները:
Մանրամասները` տեսանյութում
Aravot.am-ի հարցին`ի՞նչն է փոխվելու մինչեւ հաջորդ նստաշրջան, որ ՀԱԿ-ի համար այլեւս անհարմար չի լինի ՀՀԿ-ականների կողքին, նույն դահլիճում նստել, Լեւոն Զուրաբյանն ասաց, որ իրենք իրավիճակային են գործում:
Լրագրողներից մեկը հստակեցրեց`որքա՞ն ժամանակ է պետք ՀԱԿ-ին, սգից դուրս գալու համար. «Ոչ մի սուգ չկա և չի էլ կարող լինի, որովհետև քաղաքական գործիչները, ովքեր հավատարիմ են իրենց սկզբունքներին և արժեքներին, նրանք միշտ շարունակում են պայքարը, և ես կարծում եմ, որ հաղթանակի գրավականը հենց դրա մեջ է»:
Իսկ ՀԱԿ-ի հետագա քայլերը, ինչպես նաեւ այսօր կայանալիք հանրահավաքին, Լևոն Զուրաբյանն ասաց` ամեն ինչ կախված է ժողովրդի վրդովմունքի աստիճանից եւ ակտիվությունից:
Նելլի ԳՐԻԳՈՐՅԱՆ
