«Երեկ մենք բոլորս ականատեսը եղանք, թե ինչպես հայ ժողովուրդը գնաց եւ քվեարկեց ոչ Սերժ Սարգսյանին: Ես դրա համար շնորհակալություն եմ հայտնում, որ նույնիսկ այն պայմաններում…»,- այսօր ԱԺ նիստում Ժառանգություն խմբակցության անդամ Զարուհի Փոստանջյանը փորձեց հայտարարությամբ հանդես գալ:
Բայց ԱԺ փոխխոսնակ Էդուարդ Շարմազանովն ընդհատեց նրան. «Խոսենք բացառապես օրակարգի վերաբերյալ: Եթե այդպես շարունակեք, խախտելու եք ԱԺ օրակարգը: Եթե ունեք հայտարարություն, վաղը հայտարարությունների ժամ կա»:
Զարուհի Փոստանջյանը արձագանքեց. «Դուք այստեղ ցենզոր չեք, դուք չգիտեք ես ինչ եմ ասելու, հետեւաբար չեք կարող…» Նրա խոսափողն անջատեցին:
ՀԱԿ խմբակցության ղեկավար Լեւոն Զուրաբյանի խոսքերով՝ համաձայն ԱԺ կանոնակարգի, «հայտարարում ենք այս նստաշրջանի հետագա աշխատանքների բոյկոտի մասին, քանի որ ստեղծված իրավիճակում մենք չենք կարող ձեզ հետ նստել մի դահլիճում եւ սովորականի պես գործ անել: Բոյկոտի պատճառը հայ ժողովրդի կամարտահայտության ամոթալի ոտնահարումն է, որ տեղի ունեցավ երեկ, երբ ընտրակեղծարարության ամբողջ զինանոցի կիրառմամբ կեղծվեց Սահմանադրական հանրաքվեն: Տեղի են ունեցել բռնություններ, զանգվածային լցոնումներ, ընտրախախտումներ»:
Կարդացեք նաև
Գալուստ Սահակյանը հորդորեց անջատել խոսափողը, ասելով. «Մենք հակառակ կարծիքի ենք»:
ԱԺ փոխխոսնակ Էդուարդ Շարմազանովն էլ հեգնեց. «Տեսա՞ք քանի հոգի են իրենց խմբակցությունը, հլը մի հատ տեսեք քանի հոգի են բոյկոտում»:
Դահլիճից դուրս եկան ՀԱԿ խմբակցության 3 անդամ՝ Լեւոն Զուրաբյանը, Գագիկ Ջհանգիրյաննն ու Արամ Մանուկյանը:
ՀԱԿ-ի անդամների հեռանալու ընթացքում ՀՀԿ պատգամավոր Առաքել Մովսիսյանը տեղից բղավեց. «Բարով գնաք»:
Հռիփսիմե ՋԵԲԵՋՅԱՆ
