Քիչ առաջ ոստիկանության պետի աշխատակազմի ղեկավար, ոստիկանության փոխգնդապետ Մերուժան Հակոբյանը լրագրողներին ներկայացրեց քվեարկության ընթացքում արձանագրված խախտումների վերաբերյալ տեղեկատվություն:
Նա նշեց, որ ժամը 22:00-ի դրությամբ ընդհանուր առմամբ ոստիկանությունը ստացել է 234 ահազանգ եւ 218 զանգվածային լրատվության միջոցների հրապարակում, որոնցից 29-ը վերաբերվել են ուղղորդելուն,18-ը՝ ընտրատեղամասերում կուտակումներին, 18-ը` լրագրողական գործունեությանը խոչընդոտելուն, 20-ը՝ դիտորդական գործունեության խոչընդոտելուն, 24-ը՝ ընտրակեղծիքի կամ լցոնումների, 8-ը տեղամասերում վստահված անձանց թվաքանակի խախտման, 31-ը՝ այլ անձի փոխարեն քվեարկելուն, 5-ը քարոզչության, 13-ը՝ ընտրացուցակների ճշգրտման, 4-ը վստահված անձանց սպառնալիքի, 17-ը՝ կրկնակի քվեարկության, 7-ը ընտրակաշառքի, 7-ը բռնության կամ ծեծի, 2-ը՝ բաց քվեարկության, 2-ը` հարկադրանքի, իսկ 29-ը տեղեկատվական բնույթի ահազանգեր են եղել, որոնք ոստիկանությունը տեղում ճշտել է:
Մերուժան Հակոբյանը տեղեկացրեց, որ անձնագրերի ու վիզաների վարչության թեժ գիծն ստացել է 39 ահազանգ, որից 37-ը կրել են տեղեկատվական բնույթ: Իսկ երկու հարցերից մեկը վերաբերվել է քաղաքացու քրոջ մահվանը, որի անունը, սակայն, ցուցակում էր ընդգրկվել: Ստուգման արդյունքում պարզվել է, որ նա մահացել է արտերկրում, եւ նրա մահվան վկայականը չեն ներկայացրել։ Իսկ երկրորդ ահազանգը վերաբերվել է հաշվառմանը. տան վրա հաշվառված են եղել նրա նախկին սեփականատերերը:
Ամի ՉԻՉԱԿՅԱՆ
Կարդացեք նաև
