Հանրաքվեի կենտրոնական հանձնաժողովի անդամ Նունե Հովհաննիսյանը քիչ առաջ լրագրողներին ներկայացրեց քվեարկության ընթացքում ստացված դիմում-բողոքների, ԶԼՄ հաղորդումների եւ դրանց քննարկման արդյունքների վերաբերյալ տեղեկատվություն:
Նա ասաց, որ մինչեւ 21:00-ն Հանրաքվեի կենտրոնական հանձնաժողովը ստացել է երեք գրավոր դիմում: Առաջինը բողոք-հայտարարություն է, որն անդրադարձել է հանրաքվեի որոշ ընթացակարգերին, այն կքննարկվի մինչեւ քվեարկության արդյունքների ավարտը: Իսկ մյուս երկու դիմումները ներկայացվել են մինչեւ 18:00-ը տասնհինգ րոպեների ընթացքում հասարակական կազմակերպությունների դիտորդներից, որոնցից մեկը Asparez.am-ի լրագրող Մելինե Ավագյանից, իսկ մյուսը մի խումբ դիտորդներից եւ լրագրողներից: Դիմումները վերաբերվում են նրան, որ տեղամասերում խոչընդոտել են դիտորդների եւ լրագրողների աշխատանքները: Նունե Հովհաննիսյանը նշեց, որ ստացված դիմումների հետ կապված հանրաքվեի կենտրոնական հանձնաժողովը արագ արձագանքման միջոցառումներ է կազմակերպել, զանգահարել է նշված հանձնաժողովներ եւ դիտորդներին: Մելինե Ավագյանից պատասխան հաղորդագրություն են ստացել, որ վերջինս չունի որեւէ բողոք եւ չեն խախտվել իր իրավունքները:
«Ինքս անձամբ զրուցել եմ դիտորդների եւ լրագրողների հետ, բոլորը հերքել են, դիմումով ներկայացված այն փաստական հանգամանքը, որ տեղամասային հանձնաժողովները արգելում են դիտորդներին իրականացնել իրենց իրավունքները եւ առաքելությունը: Ներկայացված երկու դիմումները ուղարկվելու են ՀՀ գլխավոր դատախազություն, քանի որ այնտեղ խոսվում է դիտորդների իրավունքներին խոչընդոտելու մասին»,- ասաց նա:
Նունե Հովհաննիսյանը հավելեց, որ 41 հանձնաժողովներից եւ ոչ մեկում գրավոր դիմում չի ներկայացվել, իսկ բանավոր դիմումները բազմաթիվ եւ բազմաբնույթ են եղել:
Կարդացեք նաև
Ամի ՉԻՉԱԿՅԱՆ
