Գյումրու Սլաբոդկա թաղամասում գտնվող թիվ 1-ին դպրոցը թեեւ ընտրատեղամաս է, սակայն որեւէ տեղ այդ մասին չի հիշատակվում: Այստեղ է տեղակայված թիվ 34/29 ընտրատեղամասը, դպրոցի մի սենյակում, որը, սակայն, դրսից հսկում են սեւ շորեր հագած մի խումբ երիտասարդներ:
Վերջիններս մեր գտնվելու պահին անընդհատ բացում-փակում էին դուռը, թեեւ պարզեցինք, որ առավոտից այդտեղ պահակություն են անում: Մեր գտնվելու պահին երիտասարդներից մեկը, սուրճի բաժակը ձեռքին, երկու հոգու ուղղորդեց ներս: Aravot.am-ը հանձնաժողովի նախագահ Արման Գաբրիելյանից հետաքրքրվեց, թե ի՞նչ են անում այդ ջահելները ընտրատեղամասի դիմաց, ինչո՞ւ են րոպեն մեկ դուռը ճռռացնելով բացում ու փակում:
Հանձնաժողովի նախագահն ասաց, որ միջանցքը, որտեղ փակցված են ցուցակները, փոքր է, եւ այնպիսի տպավորություն է, թե մարդիկ են կուտակված: Դիտարկմանը, թե նույն մարդիկ են կանգնած, հանձնաժողովի նախագահն ասաց, որ դուրսը հսկելը հանձնաժողովի գործառույթների մեջ չի մտնում: Այստեղ միջամտեց ընտրատեղամասում այսօր աշխատող «Ասպարեզ» օրաթերթի լրագրող Էմմա Բաղդասարյանը՝ հանձնաժողովի նախագահին շշպռելով, թե հանձնաժողովի նախագահը պատասխանատու է մինչեւ 150 մետր շառավիղի համար: «Որտե՞ղ է գրված»,- հետաքրքրվեց հանձնաժողովի նախագահը: «Բոլոր օրենսդրական ակտերում, բացեք, կարդացեք»,- ասաց լրագրողը:
Հանձնաժողովի նախագահը նեղվեց, թե հիմա ես պիտի նստեմ, նայեմ, թե 150 մետրի վրա ի՞նչ է կատարվում: Նա հիշեցրեց, որ դա իր պարտականությունը չէ, այլ ոստիկանինն է: Մեր հարցին ՝ բա ոստիկաններն ո՞ւր են, հանձնաժողովի նախագահը հուզվեց. «Դիմացը կանգնած է ոստիկանը, նախագահին տեսնում եք, ոստիկանին չե՞ք տեսնում»: «Մենք ոստիկան չենք տեսել, այստեղ ոստիկան չկա»-, ասացինք մենք, որին ի պատասխան հանձնաժողովի նախագահն նետեց. «Ուրեմն Ձեր խնդիրն է, որ չեք տեսնում ոստիկանին, փոքր է եղել ուրեմն ոստիկանը»:
Կարդացեք նաև
Մինչ մենք հարցազրույց էինք անցկացնում, սեւազգեստ երիտասարդներից մեկը անընդհատ բացում-փակում էր դուռը՝ հայտնվելով մեր տեսախցիկում: Նշենք, որ Սլաբոդկան Գյումրու նախկին քաղաքապետ Վարդան Ղուկասյանի թաղամասն է, նա այստեղ է բնակվում:
Նունե ԱՐԵՎՇԱՏՅԱՆ
