«Քաղաքացի դիտորդ» նախաձեռնության անդամներն ահազանգում են Գյումրիի մի շարք ընտրատեղամասերում գրանցված ընտրախախտումների մասին: Մասնավորապես Գյումրու թիվ 41 դպրոցում Գագիկ եւ Վաղինակ Գևորգյանները գնացել են քվեարկելու ու պարզել, որ իրենց փոխարեն արդեն քվեարկել են: Նույն խնդիրն է գրանցվել նաև Գյումրու թիվ 23 դպրոցում տեղակայված ընտրատեղամասում. քաղաքացու եւ ընտանիքի անդամների անունների դիմաց քվեարկված է եղել, նախագահը խոստացել է հանձնաժողովի հետ քննարկել հարցը, բայց խախտումը չեն մուտքագրել գրանցամատյան:
Նշված երկու ընտրատեղամասերն էլ գտնվում են թիվ 34 ընտրատարածքի ներքո: Aravot.am-ը նշված ընտրատարածքային ընտրական հանձնաժողովի նախագահ Էդվարդ Բաղրամյանից հետաքրքրվեց՝ արձանագրված խախտումների առիթով ի՞նչ քայլեր են ձեռնարկվել, պարոն Բաղրամյանը պատասխանեց. «Այդ մասին մենք տեղեկություններ չունենք, տեղեկություններ կունենանք ավելի ուշ, երբ տեղամասերն ամփոփեն իրենց ընտրությունները ու փաստաթղթերը հանձնեն մեզ: Այդ ժամանակ մենք բոլոր մատյանների գրառումները ստուգում ենք և այդ մասին իմանում ենք համապատասխան ընթացք տալու համար»:
Մեր այն դիտարկմանը՝ այդ ժամանակ արդեն ուշ չի՞ լինի, հիմա քաղաքացիները չեն կարողանում քվեարկել և հարցը այդպես էլ չի կարգավորվում, հանձնաժողովի նախագահն արձագանքեց. «Մենք պարտավոր ենք բոլոր գրանցամատյաններում կատարված գրառումների նկատմամբ համապատասխան միջոցներ ձեռնարկել ու մոտեցումներ ցուցաբերել: Մենք ունենք բազում ընտրատեղամասեր ու չենք կարող դադարեցնել ընտրությունը և կոնկրետ խնդիր ուսումնասիրել: Գրանցամատյանը հենց դրա համար է ստեղծված, որ ֆիքսվի տեղի ունեցած բացթողումը ու հետագայում ընտրատարածքայինը որպես վերադաս տա իր եզրահանգումը»:
Միջադեպեր են գրանցվել նաև թիվ 33 ընտրատարածքում: Մի քանի րոպեով անջատվել են թիվ 19 դպրոցում տեղակայված ընտրատեղամասի լույսերը, սկսել է խառնաշփոթ: Aravot.am-ի հետ զրույցում ընտրատարածքային ընտրական հանձնաժողովի նախագահի տեղակալ Արթուր Խաչատրյանը պնդեց, թե հնարավոր չէ, որ իրենց ընտրատարածքում նման բան եղած լինի ու վստահեցրեց. «Մեր նախագահը ընտրություն է կատարել հենց այդ ընտրատեղամասում և հնարավոր չէր, որ դրա մասին տեղյակ չլիներ»:
Կարդացեք նաև
Նշենք, որ ըստ «Քաղաքացի դիտորդ» նախաձեռնության դիտորդների՝ ընտրախախտումներից անմասն չեն մնում նաև Վրաստանում: Մասնավորապես Վրաստանի Նինոծմինդա քաղաքում «այո»-ի ոչ պաշտոնական շտաբ են բացել, ՀՀ քաղաքացիներին իրենց անձնագրերով հավաքում բերում են Հայաստան քվեարկելու:
Տաթև ՀԱՐՈՒԹՅՈՒՆՅԱՆ
