«Մեդիա կենտրոնում» շարունակվում են Սահմանադրական փոփոխությունների հանրաքվեի ու գրանցված խախտումների վերաբերյալ քննարկումները: ՀՔԱ Վանաձորի գրասենյակի ժողովրդավարական ինստիուտների մոնիթորինգի և զեկուցման համակարգող Վարդինե Գրիգորյանն, օրինակ` փաստում է, որ ըստ իրենց դիտարկումների, ընտրացուցակներում կան բազմաթիվ մարդիկ, որոնք բացակայում են հանրապետությունից:
Նա նաեւ հավելում է, որ երբ փորձում են ստուգել ցուցակները, հաճախ ամեն ինչ ավարտվում է սպառնալիքներով. «Լոռու մարզի 30 ընտրատարածքի հանձնաժողովի նախագահը սպառնացել էր դիտորդներին, որ կձերբակալեն ապօրինի գործունեություն իրականացնելու համար: Հետաքրքրիր է, որ ՀՀԿ անդամները ստուգում են, թե ով է եկել, ով՝ ոչ, նորմալ է ընկալվում, բայց դիտորդների պարագայում ասում են՝ ձեզ կձերբակալեն, դիտորդներն իրավունք չունեն ցուցակները նկարել»:
Նրա խոսքով. «Ցուցակներում բազմաթիվ են անճշտությունները, դրանից հետո եղան լցոնումներ, աննախադեպ են խախտումների ծավալները, սա մեր պատկերացրած ամենավատից ամենավատն է: Մեր դիտորդները զանգահարում ասում են՝ մեծ ծավալի են լցոնումներն ու խախտումները, ահաբեկում են իրենց»
Քաղտեխնոլոգ Կարեն Քոչարյանը կարծում է, որ ի սկզբանե եղած մասսայական ապատիան եւ կացնային մեթոդները շարունակվում են, վերջին 4-5 տարիներին ՀՀ քաղաքական դաշտը փոշիացել է, դրա համար էլ ակտիվ են ՀԿ-ները, որոնք էլ հարցեր են լուծում:
Կարդացեք նաև
«Կարծում եմ՝ Այո-ի կողմնակիցները շատ ավելի շատ բան արեցին, իսկ Ոչ-ը բաժանվեց մի քանի հատվածի, մի մասն ասում էր փողը վերցրեք ասեք՝ ոչ, մի մասն ասում էր բոյկոտեք, մյուս մասն ասում էր գնացեք ո՛չ քվեարկեք, ի սկզբանե պետք է արվեր այնպես, որ քաղաքական քննարկումներ լինեին, հետո ամեն ինչ հանձնվեր մասնագետներին, մինչդեռ քաղաքականն ու իրավականը խառնվեցին իրար հետ»,-ասում է քաղտեխնոլոգը:
Վարդինե Գրիգորյանը մտահոգված է ոստիկանության պահվածքով: Նրա ձեւակերպմամբ, ոստիկանությունն օգնում է ընտրախախտողներին. « Միշտ էլ բազմաթիվ ահազանգերի արդյունքում լինում է ընդամենը մեկ քրեական գործ, որն ավարտվում է ինչ-որ տույժով: Մեզ մոտ ամենաանպաշտպան անձը քրեական հանցագործության դեմ վկայողն է, մանավանդ ոստիկանությունը կարող է պայմանավորվել ընտրախախտողի հետ, եւ հետո ահազանգողին մեղադրեն սուտ մատնության մեջ»:
Կարեն Քոչարյանը պնդում է, որ քաղաքական դաշտ չկա Հայաստանում, ժամանակն է «ռեսթարթ» անելու, որպեսզի իրավիճակը փոխվի: Ինչ վերաբերվում է Վարդինե Գրիգորյանին, նա էլ փաստում է, որ ժամը 17-ի դրությամբ ընտրողների 39 %-ը շատ բարձր թիվ է, դա ցույց է տալիս, որ մասնակցության մեծ մասը իրական մասնակցություն չէ:
Գոհար ՀԱԿՈԲՅԱՆ
