ՀԱԿ վարչության անդամ Զոյա Թադեւոսյանն ահազանգում է՝ 5/21 ընտրատեղամասում պարբերաբար քաղաքացիներ են գալիս ոստիկանությունից ստացած 9-րդ ձեւ (անձնագրին փոխարեն ժամանակավոր փաստաթուղթ) փաստաթղթով եւ քվեարկում ուրիշի փոխարեն: Տիկին Թադեւոսյանը երբ մեզ հետ զրուցում էր, այդ պահին էլ Այգեկցի 57 հասցեի բնակիչ Սիմոնյան Ալբերտը գնացել էր քվեարկության եւ պարզել, որ 9-րդ ձեւով իր փոխարեն քվեարկել է մեկ ուրիշ անձ: ««Բա սա ընտրությո՞ւն է,բա սա ընտրությո՞ւն է»,- վրդովված ասել է քաղաքացին:
«Այս հանցագործությունը գալիս է ոստիկանությունից, անձնագրային բաժնից տալիս են այդ 9-րդ ձեւը եւ մարդիկ գալիս են ուրիշի փոխարեն քվեարկում: 5/21 ընտրատեղամասում արձանագրել ենք, որ Պետրոսյան Էդիկի փոխարեն արդեն քվեարկած են եղել 9-րդ ձեւով, նույնը՝ Դանիելյան Վահագնի դեպքում է եղել: Մարդիկ եկել են ու տեսել են, որ իրենց անուն ազգանունի, հասցեի դիմաց արդեն քվեարկած է»: Տիկին Թադեւոսյանը նաեւ փոխանցեց այդ քաղաքացիների հասցեները՝ առաջինի դեպքում՝ Փափազյան 27/2 հասցեն է եղել, 2-րդը՝ Հովսեփ Էմինի 80/35 հասցեի բնակիչն է եղել:
«Հանձնաժողովի նախագահ Վարդանյան Թոռնիկը չափազանց հանդուգն է պահում իրեն: Հանձնաժողովում «Ժառանգության» անդամ Խաչիկյան Նարինեն «Այո»-ի հետ է համագործակցում, ամբողջովին իրենց կողմից է»:
Նելլի ԲԱԲԱՅԱՆ
