Սուրեն Սպանդարյանի անվան թիվ 24 դպրոցում տեղակայված ընտրատեղամասում հերթական միջադեպը տեղի ունեցավ: Քվեարկելու եկան մի խումբ երիտասարդներ, եւ ՀԱԿ-ի վստահված անձ Անի Ասլանյանը հերթական անգամ պնդեց, որ նրանք, թեեւ ընդգրկված են լրացուցիչ ընտրացուցակներում, բայց մարզային գրանցում ունեն: Ասլանյանը փորձեց լուսանկարել քաղաքացու անձնագիրը, ինչին միջամտեց ՀՀԿ-ի վստահված անձը՝ ասելով, որ դա արգելված է:
«Մարդու անձնագիրը վերցրել՝ նկարում ա, բա չասեմ՝ ինչի ես նկարում: Օրենքը ոչ մի բան չի ասում, բայց անձնագիրը ոչ մեկ իրավունք չունի նկարելու»,-Aravot.am-ին ասաց ՀՀԿ-ի կողմից վստահված անձը՝ Սուրեն Ներսեսյանը:
Ինչ վերաբերում է ՀԱԿ-ի վստահված անձի հնչեցրած ահազանգին, թե քաղաքացիներն ակնհայտ խմբերով են գալիս քվեարկելու, Ներսեսյանն ասաց. «Ոչ մի խումբ չկա, մարդիկ հավաքվում են, գալիս են ընտրության»:
Ի դեպ, նշյալ վստահված անձինք պարբերաբար բղավում են միմյանց վրա, հանձնաժողովի նախագահն էլ միջամտում է: Հատկանշական է, որ քվեարկության ընթացքում, երբ լրագրողները քաղաքացիներից հետաքրքրվում էին, թե որտեղ են գրանցված, վերջիններս շփոթված չգիտեին՝ ինչ պատասխանել:
Կարդացեք նաև
Լուիզա ՍՈՒՔԻԱՍՅԱՆ
