«Այսօր թիվ 7/33 տեղամասի առջև կայանված «Գազել»-ներում քաղաքացիներին գումար են բաժանել»,- ասում է «Ժառանգության» փոխնախագահ Արմեն Մարտիրոսյանը՝ վստահեցնելով, որ երեկվանից և այսօր շարունակվում է ընտրակաշառքների բաժանումը:
Ազատության հրապարակում լրագրողների հետ հանդիպման ժամանակ նա ասաց, որ վաղ առավոտից իրենք արձանագրել են մի շարք խախտումներ: Մասնավորապես, թիվ 7/23 ընտրատեղամասում 116 մարդ է եկել քվեարկելու, որոնք բոլորն ինչ-որ խմորեղենի արտադրամասի աշխատակիցներ են. «Շատ կասկածելի է»: Ըստ նրա՝ թիվ 7/22 տեղամասում կանխվել է առանց ստորագրության քվեաթերթիկներ վերցնելու փորձը, թիվ 7/27 ընտրատեղամասում քվեաթերթիկը տրվել է առանց ստորագրության, իսկ 16/42 տեղամասում (Նոր Խարբերդ) լցոնում է տեղի ունեցել:
«Այն է, ինչ սպասելի էր, չէր կարող այլ կերպ լինել: Իսկապես, չար ծառը բարի պտուղ երբևէ չի տալիս: Ավետարանական ճշմարտությունն այս դեպքում ևս աշխատեց»,- ասաց Արմեն Մարտիրոսյանը, ապա ավելացրեց, որ այս անգամ «խիստ առանձնահատուկ» են հանձնաժողովի անդամների և վստահված անձանց նկատմամբ ճնշումները. «1996 թվականից ես ընտրական հանձնաժողովի անդամ եմ եղել, 2004-ից՝ արդեն «Ժառանգության» կազմում, ու երբևէ չեմ հիշում, որ այդպիսի ճնշումներ ու գայթակղություններ լինեն հանձնաժողովի անդամների նկատմամբ»,-ընդգծեց նա:
Սիրանուշ ՀԱՅՐԱՊԵՏՅԱՆ
