Երեւանի Պ. Յավորովի անվան համար 131 հիմնական դպրոցում տեղակայված 6/1 ընտրատեղամասում անսովոր ակտիվություն էր նկատվում:
Միակ դիտորդը տեղում, էր, մեկ վստահված անձ ՀԱԿ-ից էր, երկուսը՝ ՀՀԿ-ից:
ՀԱԿ-ի վստահված անձ Անի Վարդանյանն ասաց, որ ժամը 12-ի դրությամբ ամեն ինչ նորմալ հունով է ընթանում, ու խախտումներ մինչ այդ պահը չկան:
Հանձնաժողովի անդամ՝ «Ժառանգություն» կուսակցության ներկայացուցիչ Նաիրա Հովհաննիսյանը նույնպես որեւէ արտառոց բան չէր հայտնաբերել:
Կարդացեք նաև
6/1 ընտրատեղամասի հանձնաժողովի նախագահ Վարվառա Ստեփանյանի գնահատմամբ եւս ամեն ինչ բնականոն հունով է ընթանում:
Տեղեկացանք, որ Սիսիանում գրանցված մի քաղաքացի պետք է այս ընտրական տեղամասում քվեարկի, ինչի առիթով ոմանց մոտ մտահոգություն կար: Վարվառա Ստեփանյանը նշեց, որ նրա անունն ընդգրկված է լրացուցիչ ցուցակներում, հետեւաբար քաղաքացին իրավունք ունի քվեարկելու Երեւանում, քանի որ այսօր գտնվում է Երեւանում եւ ուզում է անպայման մասնակցել քվեարկությանը:
Մեր հարցին՝ իսկ եթե երեկոյան էլ գնա՞ ու Սիսիանում կրկին քվեարկի, հանձնաժողովի նախագահը պատասխանեց, որ անձնագրում կնիք է դրվելու:
Իսկ արդյոք կնիքի թանաքը մի քանի ժամից չի՞ ցնդի: «Կցնդի, բայց որոշակի ժամկետ չեմ կարող ասել»,- չթաքցրեց նա:
Քվեարկությանը մասնակցում էր նաեւ 1930 թ ծնված Ժենյա տատիկը, նա ասաց, որ ամեն անգամ գալիս է քվեարկելու, ողջ առողջ չէ, ոչնչից չի բողոքում, բայց ինքն էլ չգիտի, թե ինչ է քվեարկում:
Գոհար ՀԱԿՈԲՅԱՆ
