Ոստիկանության անձնագրային եւ վիզաների վարչության պետ Մնացական Բիչախչյանը քիչ առաջ ներկայացրեց հանրաքվեին մասնակցելու իրավունք ունեցող քաղաքացիների ցուցակների, լրացուցիչ ցուցակների կազմավորման հիմունքները:
Նա նշեց, որ նախնական ցուցակների հրապարակման պահի դրությամբ քվեարկությանը մասնակցած անձանց թիվը կազմում է 2 555 831: Ոստիկանությունը ժամանակ է տվել անհատներին, քաղաքական, հասարակական կազմակերպություններին, զանգվածային լրատվական միջոցներին ցուցակներում առկա անճշտության մասին տեղեկատվությունը տրամադրել ոստիկանությանը, ստեղծվել է թեժ գիծ: Մնացական Բիչախչյանն ասաց, որ թեժ գիծը ստացել է 88 զանգ, որից 82-ը եղել է տեղեկատվական բնույթի՝ ցուցակներում տվյալները որոնելու, տեղամասի վայրի, լրացուցիչ ցուցակներում ընդգրկվելու մասին: 5 զանգով ստուգված տեղեկատվության արդյունքում պարզվել է, որ բնակչության պետական ռեգիստրում վրիպակի արդյունքում հասցեն նշվել է թերի կամ սխալ, սխալը շտկվել է, իսկ մեկի զանգի դեպքում պարզվել է, որ տեխնիկական սխալի պատճառով քաղաքացու տվյալները չեն ընդգրկվել պետական ռեգիստրում:
Մնացական Բիչախչյանն ասաց, որ ավելորդ շահարկվում է մահացած անձանց տվյալները ցուցակներում լինելու հարցը, նույնիսկ այն դեպքում, երբ անձի տվյալները հասանելի չեն եղել իրավասու մարմնին: Նա նշեց, որ համայնքային ոստիկանությունը բնակարաններ այցելություններ է կատարել, որոնց արդյունքում ոստիկանությունը ստացել է 5000 մահացած անձի մասին տվյալներ, որոնք գրանցված չեն եղել ՔԿԱԳ մարմիններում, կամ ոստիկանությունը սահմանված կարգով չի ստացել:
Մնացական Բիչախչյանը նշեց, որ ոստիկանությունը ուսումնասիրություն է կատարել հանրապետությունում 105 տարեկանից բարձր 23 անձանց մասին, որոնք ողջ են:
Կարդացեք նաև
Մնացական Բիչախչյանը նշեց, որ շահարկվում է նաեւ ընտրողների ցուցակներում կրկնվող անհատական տվյալների առկայությունը, ոստիկանությունը տարածել է անհատական տվյալներ ունեցող անձանց ցանկը, որում առկա է եղել 109 անհատական համընկումով 218 ընտրող, իսկ վերջնական ցուցակներում առկա է 110 անհատական համընկումով 220 ընտրող:
Ամի ՉԻՉԱԿՅԱՆ
-Նա նշեց, որ նախնական ցուցակների հրապարակման պահի դրությամբ քվեարկությանը մասնակցած անձանց թիվը կազմում է 2 555 831:-
Փաստորեն, արդեն 2 555 831 մարդ քվեարկել է: Ասում են, որ հայերենը դժվար լեզու է: Բայց էսքան դժվա՞ր ու հայերեն գրողի համա՞ր: