Քիչ առաջ Հանրաքվեի կենտրոնական հանձնաժողովի նախագահ Տիգրան Մուկուչյանը ներկայացրեց հանրաքվեի մասին տեղեկություններ:
Նա ասաց, որ ձեւավորվել է 1997 տեղամաս եւ նույնքան էլ տեղամասային հանձնաժողով, որոնցից 8-ը տեղակայված են քրեակատարողական հիմնարկներում, որոնցից մեկը, համաձայն Հանրաքվեի կենտրոնական հանձնաժողովի որոշման, պետք է բացվի 11:00-ին, իսկ մյուսները՝ 17:00-ին: Նա նշեց, որ մնացած՝ ընդհանուր թվով 1989 տեղամասային կենտրոնները բացվել են ժամը 8:00-ին եւ ընդունել առաջին քվեարկողներին:
«Նշված տեղամասային ընտրական հանձնաժողովներում ընդհանուր թվով նշանակված են եղել 15 հազար 976 քաղաքացիներ, որպես հանձնաժողովի անդամներ։ Այսօր առավոտյան աշխատանքներին չեն ներկայացել ընդհանուր թվով 141 հանձնաժողովի անդամներ, որոնց փոխարեն սահմանված կարգով նշանակումներ են կատարվել՝ համապատասխան ընտրատարածքային հանձնաժողովների նախագահների կողմից։ Միաժամանակ տեղեկացնեմ, որ ըստ ընտրատարածքներից ստացված տեղեկատվության, տեղամասերի հանձնաժողովների առաջին նիստերը գումարելիս, ընտրատեղամասերին բացման պահին տեղամասերի 85-90%-ում ներկա են գտնվել վստահված անձինք, դիտորդներ կամ զանգվածային լրատվական միջոցների ներկայացուցիչներ։ Ըստ էության՝ լիարժեք ծավալով ապահովված է հրապարակայնությունը նշված գործընթացի նկատմամբ»,-ասաց նա։
Վերջում Տիգրան Մուկուչյանն ընդգծեց, որ ըստ ընտրատարածքային ընտրական հանձնաժողովներից ստացված տեղեկատվության՝ տեղամասերը բացված են ու քվեարկությունը ընթանում է բնականոն ընթացքով։
Կարդացեք նաև
Ամի ՉԻՉԱԿՅԱՆ
